Batumelebi | `ქრისტიან-დემოკრატებს’ ბათუმში ოფისის დატოვებას სთხოვენ `ქრისტიან-დემოკრატებს’ ბათუმში ოფისის დატოვებას სთხოვენ – Batumelebi
RU | GE  

`ქრისტიან-დემოკრატებს’ ბათუმში ოფისის დატოვებას სთხოვენ

 

ბათუმის საკრებულო „ქრისტიან-დემოკრატიული მოძრაობისგან” მოითხოვს დატოვოს ის შენობა, სადაც პარტიის ბათუმის ორგანიზაცის ოფისია განთავსებული.

 

აღნიშნული საკითხის განხილვა სხდომაზე ბათუმის საკრებულოს ფრაქცია „ერთიანი ნაციონალური მოძრაობის” თავმჯდომარემ ნოდარ დუმბაძემ მოითხოვა და საკრებულოს თავმჯდომარეს, ირაკლი ჩავლეიშვილს აღნიშნულ საკითხზე თავისი პოზიციის დაფიქსირება სთხოვა.

როგორც ნოდარ დუმბაძე განმარტავს, საქართველოს პარლამენტის დადგენილებით თუ პარტია არჩევნებში 5%-იან ბარიერს გადალახავს, მაშინ ქალაქის თვითმმართველობა ვალდებულია ის ფართით უზრუნველყოს,  რადგან 2012 წელს „ქრისტიან-დემოკრატიული მოძრაობა“ პარლამენტში ვერ მოხვდა, მან ეს ფართი უნდა გაათავისუფლოს. 

საკრებულოს თავმჯდომარის ირაკლი ჩავლეიშვილის თქმით, აღნიშნულ საქმეზე სამოქალაქო დავა სასამართლოში მიმდინარეობს და მისთვის გაურკვეველია თუ რატომ არ შეუწყვიტა იუსტიციის სამინისტრომ პარტიას ხელშეკრულება.
ამასთან, საკრებულოს თავმჯდომარე იწონებს ნაციონალური მოძრაობის მოთხოვნას სამართლიანობის აღდგენასთან დაკავშირებით, თუმცა აცხადებს, რომ მათ სამართლიანობის შეგრძნება მათი მმართველობის პერიოდში არ ჰქონდათ.

„მათი მმართველობის პერიოდში სამართლიანობის შეგრძნება დაკარგული ჰქონდათ, მე არ დამავიწყდება ის ფაქტი, რომ მათ მემედ აბაშიძის ქუჩაზე არსებული პარტიის საქალაქო ოფისი ხელში ჩაიგდეს საბაზრო ღირებულებასთან შეფარდებით ათჯერ უფრო ნაკლებ ფასად.“ –  განაცხადა საკრებულოს თავმჯდომარემ. 

როგორც „ბათუმელებს“ ქდმ-ს წევრმა ნუგზარ ფუტკარაძემ განუცხადა, პარტია უარს არ ამბობს ფართის დათმობაზე, თუმცა აღნიშნული ფართს, რომელიც მათ თვითთმართველობამ გადასცა, პარტიის თანხებით ჩაუტარდა სარემონტო სამუშაოები, ამიტომ ისინი მოითხოვენ ამ თანხის სანაცვლოდ მათ დროებით გადაეცეთ ფართი არენდის წესით სარგებლობაში, ან ეს თანხა იქნას აუნაზღაურდეთ.  

.

ნეტგაზეთის მასალების სხვა გამოცემებში გადაბეჭდვის წესი
თამარ ჯაყელი