სპარტაკ ანთაძისა და მარინე ქილიფთარის ოჯახი ბათუმში, ხიმშიაშვილის ქუჩაზე 124 კვმ ფართს მიიღებს. ოჯახს ქალაქის თვითმმართველობა დამატებით 30 875 ლარს სარემონტო სამუშაოებისათვის გამოუყოფს.
ოჯახის დიასახლისის მარინე ქილიფთარის თქმით, სახლში, სადაც ამ დრომდე ცხოვრობდნენ, ნორმალური საცხოვრებელი პირობები არ იყო.
როგორც ბათუმის საკრებულოს თავმჯდომარემ ირაკლი ჩავლეიშვილმა ჟურნალისტებს განუცხადა, ქალაქის თვითმმართველობა მომავალშიც გააგრძელებს მრვალაშვილიანი ოჯახებისათვის საცხოვრებელი ფართის უზრუნველყოფის პროგრამას.
„ბატონ სპარტაკ ანთაძეს და მის შვიდ სულიან ოჯახს გადავეცით ბინა. მომავალ საკრებულოს სხდომაზე ალბათ კიდევ ერთ შვიდსულიან ოჯახს დავაკმაყოფილებთ ბინით. ასე რომ, რასაც ბატონი პაატა ბურჭულაძე ახერხებს თბილისში, ჩვენ, საკრებულო, ვახერხებთ ბათუმში და მე მგონი მისასალმებელია“- აღნიშნა საკრებულოს თავმჯდომარემ.
მისივე თქმით, ამ დროისთვის ბათუმის საკრებულომ საცხოვრებელი ბინით უკვე სამი მრავალშვილიანი ოჯახი უზრუნველყო.
