ბათუმის მერიამ უარი უთხრა მართლმადიდებელ ეკლესიას, ბესიკის ქუჩაზე მდებარე ნაკვეთის საკუთრებაში გადაცემაზე. უფრო სწორად, ეკლესია მიწის საკუთრებაში რეგისტრაციას მერიის გვერდის ავლით ცდილობდა, საჯარო რეესტრმა კი მერიას, როგორც მიწის მესაკუთრეს მიმართა – დაეფიქსირებინა თავისი პოზიცია ქონების ეკლესიისთვის საკუთრებაში გადაცემაზე. მერიის უარის შემდეგ, რეესტრმა სარეგისტრაციო წარმოება შეწყვიტა.
„ქალაქ ბათუმის მუნიციპალიტეტის მერია არ არის თანახმა, საჯარო რეესტრის ეროვნული სააგენტოს მიერ განხორციელდეს ქ. ბათუმის მუნიციპალიტეტის საკუთრებაში რეგისტრირებული, ქ. ბათუმში, ბესიკის, ლ. ასათიანის/დ. თავდადებულის ქუჩებს შორის მდებარე მიწის ნაკვეთის საზღვრის კორექტირება, ასევე, საქართველოს სამოციქულო ავტოკეფალური მართლმადიდებელი ეკლესიის საკუთრების უფლებით რეგისტრაცია“, – აღნიშნულია ბათუმის მერის მიერ საჯარო რეესტრში გაგზავნილ წერილში.
ამასთან, მერის ამავე წერილში აღნიშნულია, რომ ბათუმის მერია თანახმაა მართლმადიდებელ ეკლესიას აღნიშნული ნაკვეთი სარგებლობაში გადასცეს.
თუმცა, ამ მიწის ნაკვეთს ეკლესია წლებია ისედაც სარგებლობს და იქ ეკლესიაც ააშენა. მოქმედი ეკლესიის მიმდებარედ, ქალაქის ბიუჯეტის დაფინანსებით ჯერ მინისტადიონი მოეწყო, შემდეგ – სკვერი, მოგვიანებით მთელი ეს ტერიტორია ეკლესიამ შეღობა.
„აქვე განვმარტავთ, რომ ქალაქ ბათუმის მუნიციპალიტეტის მერიას მიზანშეწონილად მიაჩნია საქართველოს სამოციქულო ავტოკეფალურ მართლმადიდებლურ ეკლესიას უზუფრუქტის ფორმით, აღნაგობის უფლებით, სარგებლობაში გადაეცეს თვითმმართველი ქალაქ ბათუმის საკუთრებაში არსებული, ქ. ბათუმში, ბესიკის, ლ. ასათიანის/დ. თავდადებულის ქუჩებს შორის მდებარე 1 926 კვ.მეტრი არასასოფლო-სამეურნეო დანიშნულების მიწის ნაკვეთი, რაც შესაძლებელია განხორციელდეს საქართველოს ორგანული კანონის „ადგილობრივი თვითმმართველობის კოდექსის“ შესაბამისად“, – აღნიშნულია ბათუმის მერის მიერ რეესტრში გაგზავნილ წერილში.
რეესტრმა წერილი მერიას 2021 წლის 17 აგვისტოს მისწერა. ბათუმის მერმა კი რეესტრს 7 თვის შემდეგ, 2022 წლის 10 მარტს უპასუხა.
დღევანდელი მდგომარეობით [23.08.2022] აღნიშნული ნაკვეთის მართლმადიდებელი ეკლესიის სარგებლობაში გადაცემის რაიმე დოკუმენტი საჯარო რეესტრის პორტალზე ასახული არ არის.
რის საფუძველზე ითხოვდა ეკლესია მიწის საკუთრებაში რეგისტრაციას და რატომ მიმართა რეესტრმა ბათუმის მერიას – ამ თემაზე ვრცლად ნახეთ ბმულზე:
ეკლესია ბათუმში 1926 კვ/მეტრ მიწას ითხოვს, რეესტრი მერიის დასტურს
