Batumelebi | ვახო წულაძე აჭარის პირველი გარემოსდამცველი გახდა ვახო წულაძე აჭარის პირველი გარემოსდამცველი გახდა – Batumelebi
RU | GE  

ვახო წულაძე აჭარის პირველი გარემოსდამცველი გახდა

ცაგო კახაბერიძე 

აჭარის  გარემოს დაცვის სამმართველოს ხელმძღვანელად აჭარის ახალი მთავრობის გადაწყვეტილებით ვახო წულაძე დაინიშნა.  ის დღეს,  22 ნოემბერს სამმართველოს თანამშრომლებს მთავრობის იურიდიული დეპარტამენტის ხელმძღვანელმა  წარუდგინა. 

„…ძილის მდგომარეობაში მყოფი სამმართველოდან უნდა გადავიქცეთ აქტიურ ორგანოდ, მინდა გითხრათ, რომ ექვსი თვე ვერ დავიძინებთ და მეც თქვენთან ერთად ვიქნები“ –  ამ სიტყვებით დაიწყო თანამშრომლებთან ურთიერთობა გარემოს დაცვის სამმართველოს ახალმა ხელმძღვანელმა. სამმართველოს თანამშრომლებს მისი შეფასება არ გაუპროტესტებით, დუმილით უპასუხეს მოსალოდნელი ექვსთვიანი უძილობის შესახებ შეტყობინებასაც.  

 

 

პირველ რიგში გასაკეთებელ საქმეთა ჩამონათვალში, სამმართველოს ახალმა ხელმძღვანელმა დონორი ორგანიზაციების მოძიება და სტრუქტურული ცვლილებები დაასახელა. ახალ ხელმძღვანელს  სამუშაო მაგიდაზე წინამორბედისგან  სამმართველოს დოკუმენტები, სამუშაო მაგიდასთან კედელზე კი მიხეილ სააკაშვილის ფოტო დახვდა.   

 

სამმართველოს უფროსის თანამდებობა ვაკანტურია გასული პარასკევიდან, მას შემდეგ, რაც ყოფილმა ხელმძღვანელმა ოლეგ ბოლქვაძემ თანამდებობა საკუთარი სურვილით დატოვა.

 

 წინამორბედისგან განსხვავებით ვახო წულაძეს გარემოს დაცვის სფეროში მუშაობის გამოცდილება აქვს. ის არაერთი საერთაშორისო გარემოს დაცვითი პროექტის კოორდინატორი, მათ შორის ბუნების დაცვითი მსოფლიო ფონდის (WWF) მტირალას ეროვნული პარკის კოორდინატორი და UNDP -ის  კონსულტანტი იყო აგროეკოლოგიისა და ეკონომიკის დარგში. ბოლო პერიოდში კი ის ბათუმის ბულვარის მარკეტინგულ სამსახურს ხელმძღვანელობდა.   

 

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე