გარემოს ეროვნული სააგენტოს აჭარის რეგიონული ჰიდრომეტეოროლოგიური ობსერვატორიის ინფორმაციით, ქალაქ ბათუმში უახლოესი ერთი კვირის განმავლობაში თოვლი მოსალოდნელი არ არის. 9 დეკემბერს სანაპირო ზოლში და მთლიანად აჭარის რეგიონში დროებით გამოიდარებს, თუმცა 10 დეკემბრიდან ამინდი კვლავ გაუარესდება. მოსალოდნელია ნალექი – დაბლობში წვიმა, მთაში კი თოვლი.
10 დეკემბრიდან 15 დეკემბრამდე პერიოდში სანაპირო ზოლში ჰაერის ტემპერატურა დღისით +1 – +7 გრადუსი, ხოლო ღამით +1 – +6 გრადუსი იქნება. ამავე პერიოდში მთაში დღისით 1-5 გრადუსი სითბო, ხოლო ღამით 2 გრადუსი ყინვა 3 გრადუსი სითბოა მოსალოდნელი. აჭარის მაღალმთიანეთში ღამით -2-7 გრადუსი ყინვა, ხოლო დღისით -5 გრადუსი ყინვა, 3 გრადუსი სითბოა ნავარაუდევი.
დღეს ინტენსიურად თოვს აჭარის მაღალმთიანეთში. ობსერვატორიის პროგნოზით, თოვა მთაში ხვალ შეწყდება, თუმცა 10 დეკემბრიდან კვლავ მოთოვს, განსაკუთრებით ღამით.
წინასწარი პროგნოზით, დეკემბრის პირველ ნახევარში კარგ ამინდს არ უნდა ველოდოთ და ავდარი თვის მეორე ნახევარშიც გაგრძელდება.
აჭარის სანაპიროს გასწვრივ, ზღვაზე, მომდევნო ერთი კვირის განმავლობაში შენარჩუნდება შტორმი – 4-5 ბალი .
ბათუმის სანაპირო / 8.12.2016 / თედო ჯორბენაძის ფოტო
