სიახლეები

მაღალმთიანეთში გზებს თოვის შეჩერების შემდეგ გაწმენდენ

08.12.2016 • 1742
მაღალმთიანეთში გზებს თოვის შეჩერების შემდეგ გაწმენდენ

აჭარის მაღალმთიანეთში ინტენსიურად თოვს. გამგეობების მუნიციპალური ცენტრებიდან სოფლებამდე მისვლა მხოლოდ ორხიდიანი, ჯაჭვებით აღჭურვილი მანქანითაა შესაძლებელი. შიდა სასოფლო გზები გაწმენდილი არ არის. ხულოს, შუახევისა და ქედის გამგებლებმა „ბათუმელებს“ უთხრეს, რომ გაწმენდითი სამუშაოები ინტენსიური თოვის შეწყვეტის შემდეგ დაიწყება.

„ტექნიკა მუშაობს ადმინისტრაციულ ცენტრებთან მისასვლელად. ამჟამად იწმინდება გზები გოდერძის, ღორჯომის, ხიხანის, ვაშლოვნისა და ოქრუაშვილების მიმართულებით. ამ დროისთვის დაახლოებით 20 სოფელს არ მიეწოდება ელექტროენერგია. მათ შუქის მიწოდება გუშინ საღამოს შეუწყდათ. აღდგენაზე დღეს დილიდან მუშაობენ ენერგოკომპანიის წარმომადგნლები,” – ამბობს ბესიკ ბაუჩაძე, ხულოს მუნიციპალიტეტის გამგებელი.

ხულოს მუნიციპალიტეტის გზებზე აჭარის გზების დეპარტამენტი მუშაობს. ბესიკ ბაუჩაძის ინფორმაციით, ხულოს გამგეობა ჯერჯერობით ვერ იყენებს იმ ტექნიკას, რომელიც ტენდერით გამგეობამ შეიძინა: „ეს მანქანა უკვე ჩვენთანაა, მაგრამ ჯერ მიღება-ჩაბარების აქტი არაა გაფორმებული, სხვა დოკუმენტაციაც მოსაწესრიგებელია და მისი გამოყენების უფლება არ გვაქვს. დაახლოებით ერთ კვირაში ამ მძიმე ტექნიკის გამოყენებასაც შევძლებთ.”

თოვის გადაღებას ელოდება შუახევის გამგებელიც. ტარიელ ებრალიძემ გვითხრა, რომ ამ ეტაპზე გზების გაწმენდას აზრი არ აქვს, რადგანაც ინტენსიურად თოვს. გამგეობას 14 ერთეული მძიმე ტექნიკა აქვს, რომელსაც ამ ეტაპზე არ იყენებს: „გზების დეპარტამენტმა გაწმინდა გზები და ყველა ადმინისტრაციულ ცენტრთან მისვლა არის შესაძლებელი ორხიდიანი, ჯაჭვებიანი მანქანით. ამინდს უნდა დაველოდოთ, შემდეგ დაიწყება შიდა სასოფლო გზების გაწმენდა“.

„ისე თოვს ახლა, გაწმენდას აზრი არ აქვს.” – გვითხრა ქედის მუნიციპალიტეტის გამგებელმა, დავით დუმბაძემ. მისი თქმით, თოვლის საფარის სიმაღლე დაახლოებით 10 სმ.-ია მახუნცეთში, ხოლო მაღალმთიან სოფლებში – ნახევარი მეტრი. გამგებლის თქმით, გზები იმ სოფლებისკენ გაწმინდეს, სადაც გარდაცვლილია ვინმე, ან ქრონიკული ავადმყოფი: „დღეს, მაგალითად, იწმინდება გზები ნამონასტრევის, პირველი მაისის და ოქტომბრის მიმართულებით. ახლა მქონდა საუბარი სასწრაფოს უფროსთან, რომელ სოფლებშია ქრონიკული ავადმყოფი, სად შეიძლება გახდეს, პირველ რიგში, სასწრაფოს გამოძახება საჭირო. ამის მიხედვით გავწმენდთ გზებს,” – ამბობს დავით დუბაძე, ქედის გამგებელი.

აჭარის მთავრობის ინფორმაციით, დიდთოვლობის გამო გაზაფხულამდე ჩაიკეტა გოდერძი-ახალციხის უღელტეხილის მონაკვეთი.

 

გადაბეჭდვის წესი


ასევე: