დღეს, 2 მაისს, თბილისში დამოუკიდებელი მედიის მხარდამჭერი მარში გაიმართა. „თავისუფლება მზიას, თავისუფლება მედიას“ – სკანდირებენ აქციის მონაწილეები.
მზია ამაღლობელი გამოცემა „ბათუმელების“ და „ნეტგაზეთის“ დამფუძნებელია. ის უკვე 14 თვეა უკანონო პატიმრობაშია. 2025 წლის 16 დეკემბერს პატიმრობაში მყოფ ჟურნალისტსა და მედიამენეჯერს, მზია ამაღლობელს, სტრასბურგში, ევროპარლამენტში, ევროკავშირის ადამიანის უფლებათა უმაღლესი ჯილდო, სახაროვის პრემია გადასცეს.
მზია ამაღლობელის საჩივრის განხილვა უკვე დაიწყო სტრასბურგის სასამართლომ.
„მარში მედიისთვის“ ფილარმონიის მიმდებარე ტერიტორიიდან დაიწყო და პარლამენტთან უნდა დასრულდეს. მედიის სოლიდარობის მარში პრესის თავისუფლების მსოფლიო დღესთან დაკავშირებით იმართება, რომელიც ხვალ, 3 მაისს აღინიშნება.
პრესის თავისუფლების ინდექსში საქართველო ბოლო წლებში 75 ადგილით ჩამოქვეითდა.
საერთაშორისო ორგანიზაციის, „რეპორტიორები საზღვრებს გარეშეს“ (RSF) თანახმად, 2026 წელს საქართველო პრესის თავისუფლების ინდექსში, წინა წელთან შედარებით, 21 ადგილით ჩამოქვეითდა და 180 ქვეყანას შორის 135-ე ადგილზეა ჰონგ-კონგთან და ელ სალვადორთან ერთად.
აქციის მონაწილეებმა მედიის მხარდამჭერი მარში შაბათის მარშებს დაამთხვიეს.
