Batumelebi | აჭარის ტელევიზიის ახალი დირექტორი: ამბობენ, რომ ბევრია დანიშნული ნეპოტიზმით აჭარის ტელევიზიის ახალი დირექტორი: ამბობენ, რომ ბევრია დანიშნული ნეპოტიზმით – Batumelebi
RU | GE  

აჭარის ტელევიზიის ახალი დირექტორი: ამბობენ, რომ ბევრია დანიშნული ნეპოტიზმით

მეტი სოციალური პასუხისმგებლობა, მაღალი რეიტინგი, გაზრდილი ნდობის ხარისხი და ბიუჯეტი აჭარის ტელევიზიის ახალი დირექტორის პროგრამა მაქსიმუმია. პროფესიით იურისტი ნათია კაპანაძე თანამშრომლებს ასევე ჰპირდება, რომ იზრუნებს თითოეულის კვალიფიკაციის გაზრდაზე. როგორ აპირებს ამ ყველაფრის მიღწევას გასულ კვირას დანიშნული დირექტორი? – ამ და სხვა კითხვებზე ნათია კაპანაძემ „ბათუმელებს“ უპასუხა.

ნათია, რას შეცვლის ახალი დირექტორი აჭარის ტელევიზიაში?

ახალი დირექტორი შეცვლის განვითარების ტემპს. უფრო მეტი აქცენტი იქნება პროგრესზე და ადამიანზე, ადამიანზე – მაყურებელზე და ადამიანზე – დასაქმებულზე.

ახალი სახეები გამოჩნდებიან?

ჩემი სურვილია ერთი ძალიან მნიშვნელოვანი უფლების პატივისცემა და ეს არის საავტორო უფლებები. ჩვენ გვყავს არაჩვეულებრივი რეჟისორები, პროდიუსერები, რომლებსაც შეუძლიათ წარმოადგინონ საკუთარი იდეა, თუ როგორი უნდა იყოს მათი ახალი გადაცემა. ვფიქრობ, მხარს დავუჭერ ამ იდეებს, რა თქმა უნდა, არსებული მოცემულობიდან და შესაძლებლობიდან გამომდინარე. თუკი არ იქნება შიდა რესურსი საკმარისი და გაჩნდება საჭიროება, კარგი პროდუქცია რომ გამოვიდეს, ვიფიქრებდი ახალი სახეების შერჩევაზე, ოღონდ მხოლოდ კონკურსის წესით – როგორც სტაჟირების პროგრამაში, ასევე დასაქმების შემთხვევაში.
რეკრუტირების ან სხვა წესს აჭარის ტელევიზიაში ვერ გამოვიყენებ, რადგან ერთ-ერთი მთავარი ნაკლი, რაც ამ ორგანიზაციას აქვს, ნეპოტიზმია. ამბობენ, რომ ძალიან ბევრი ადამიანია დასაქმებული ნეპოტიზმით. შეიძლება ვიცით, რომ ჩვენს მეგობრებს აქვთ მაღალი კვალიფიკაცია, კარგი უნარები, მაგრამ მგონი ეს არ არის საკმარისი იმისთვის, რომ თანაბარი პლატფორმა შევქმნათ. ნებისმიერი პირი მიიღება კონკურსის წესით.

ჭარის ტელევიზიის ზოგიერთი თანამშრომელი შიშობს, რომ თქვენი მისვლით შეიძლება სამსახური დაკარგოს. მეორე მხრივ, არაერთხელ მოგვისმენია იმავე ტელევიზიის თანამშრომლებისგან, რომ არც თუ ისე ცოტა ადამიანი, მათ შორის თანამდებობის პირები, არაფერში იღებენ ხელფასს. რას ეუბნებით მათ – შეინარჩუნებენ სამსახურს?

ასეთ ადამიანებს დაწესებულებებში ქვიათ „უჩინარი“ ადამიანები. მე არ ვიცი რამდენია და ვინ არიან ისინი. დაახლოებით სამ თვეში ალბათ უკვე მექნება პასუხი, არის თუ არა ასეთი ადამიანი ორგანიზაციაში. თუ იქნება, სამი თვის შემდეგ, მას აუცილებლად ექნება მკაფიო ამოცანა და პასუხიმგებლობა.

ტელევიზიას ჰქონდა მცდელობა თანამშრომლები ტესტირება-კონკურსის წესით მიეღო. ჩაატარეს კიდეც კონკურსი, მაგრამ შემდეგ ტელევიზიაში დაბრუნდნენ ის თანამშრომლები, ვინც კონკურსი ვერ გაიარა. აპირებთ ტელევიზიაში კონკურსების-ტესტირებების ჩატარებას, თუნდაც ჟურნალისტებისთვის?

საზოგადოებრივი არხები, მითუმეტეს, აჭარის ტელევიზია ძალიან მყიფეა _ სამი წელია, რაც საზოგადოებრივი მაუწყებლის სტატუსი აქვს. ახალი აქცენტებით მუშაობა ჟურნალისტებსაც სულ რაღაც სამი წელია უხდებათ. მანამდეც ახორციელებდნენ ჟურნალისტურ საქმიანობას, იღებდნენ და ავრცელებდნენ ინფორმაციას, მაგრამ განსხვავებულ ფორმატში სამი წელია ამუშავებენ ინფორმაციას. ეს არ არის დიდი დრო. მე, როგორც ახალ დირექტორს, არ მაქვს საწყის ეტაპზე პოლიტიკა, რომ ჩავატაროთ ხელახალი ატესტაცია. ვფიქრობ, კარგი დასაწყისია დიაგნოსტირება, სად გვაქვს პრობლემები. ვთქვათ, ეს არის ჟურნალისტური ეთიკის ქარტიის მონიტორინგის შედეგი, მარეგულირებელი კომისიის შედეგი, გარე კრიტიკა, `მედიაჩეკერის~ კრიტიკა, ბათუმში მცხოვრები ადამიანების მოსაზრებები. ამ ყველაფრის ანალიზის შემდეგ დაიგეგმება ტრენინგები. ატესტაცია, რა თქმა უნდა, ერთ-ერთი ფორმაა იმისთვის, რომ დასაქმებულების კვალიფიკაცია გადამოწმდეს.

საზოგადოებრივი მაუწყებელი [პირველი არხი] თავად გეგმავს ატესტაციას. მე ჩართული ვიყავი ამ საკითხებში. დიდია მონდომება, რომ კვალიფიკაციასთან დაკავშირებული საკითხები გადაიხედოს. ვფიქრობ, მომავალში ეს პრაქტიკა დამეხმარება იმაში, რომ ჩვენც ვიფიქროთ ამაზე, მაგრამ საწყის ეტაპზე ასეთი აქცენტები არ გაკეთდება. შევამზადებთ და სათანადო უნარ-ჩვევებით აღვჭურვავთ ადამიანებს. წინასწარ გაცხადდება, რომ საბოლოოდ მივდივართ იქამდე _ თუკი კვალიფიკაციასთან დაკავშირებით დადგება საკითხი და ალბათ დადგება, ადამიანები მზად უნდა იყვნენ ამისთვის.

ერთ-ერთ კომენტარში ამბობთ, რომ გაქვთ სურვილი, რაც შეიძლება მეტმა ადამიანმა იმუშაოს აჭარის ტელევიზიაში. მეტი კადრის საჭიროება იგულისხმეთ?

ბევრს საუბრობენ იმაზე, რომ საზოგადოებრივ არხებში და საერთოდ საბიუჯეტო ორგანიზაციებში ბევრი ადამიანი მუშაობს და ხშირად ისინი არ ასრულებენ თავიანთ ფუნქციებს. ვფიქრობ, მენეჯერის ამოცანაა გადამოწმოს თითოეული ადამიანი არის თუ არა პასუხიმგებლიანი, კონკრეტული ფუნქციები და პასუხისმგებლობები სწორად არის თუ არა განაწილებული და სრულდება თუ არა სამუშაოები იმ მოლოდინებით, რაც არის გათვალისწინებული.

რაც შეეხება დამოკიდებულებას, რომ უფრო მეტმა ადამიანმა უნდა იმუშაოს არხზე, ვფიქრობ, აჭარის ტელევიზიასა და რადიოს აქვს შესაძლებლობა კიდევ უფრო ძლიერი მედია ორგანიზაცია იყოს. მას შემდეგ რაც დაზუსტდება დასაქმებული კადრების მუშაობის ხარისხი, ვფიქრობ, აქცენტი უნდა გავაკეთოთ გაზრდაზე, ორგანიზაციის გაძლიერებაზე, რაც ალბათ გამოიხატება უფრო კარგი სტაჟირების პროგრამით, კიდევ უფრო მეტი ადამიანის მოზიდვის მცდელობით. ვინც არის დასაქმებული, მათთან ერთად უნდა გავაანალიზოთ რა გვევალება და რა ამოცანებს ვასრულებთ. თუ ვერ ვასრულებთ, რატომ? როცა გვექნება დიაგნოზი, შესაბამისი ტრენინგები უნდა ჩატარდეს.

მე განვითარების მენეჯერის პოზიციაზე ყოფნისას, მომავალი წლისათვის დავგეგმე დაახლოებით ათი ძირითადი ტრენინგი. ეს თანამშრომლების უმრავლესობას პროფესიული უნარების ამაღლების შესაძლებლობას მისცემს. როგორც მთავარ მენეჯერს, ვფიქრობ, როდესაც კიდევ უფრო მეტი წვდომა მექნება ადამიანურ რესურსებზე, შესრულებული სამუშაოების ანალიზზე, დაემატება ტრენინგები უნარჩვევების გასაძლიერებლად. რატომ ვფიქრობ ასე? _ როცა ვუყურებ ასეთ დაწესებულებებს და საზოგადოებრივ არხებს, იქ საუბარია ერთის მხრივ იმაზე, რომ კადრები არის დაბერებული, მაგრამ ის ინსტრუმენტები, რაც არის თანამედროვე მედიაში სამუშაო, მარტივია შესასწავლად; და პირიქით, როცა გაქვს ამის გამოცდილება, ძალიან მარტივია გამოსაყენებლად. ამიტომ ძირითადი აცენტი იქნება თანამშრომლებზე ზრუნვა, თუ გამოიკვეთა კონკრეტული საკითხი, არც სპეციალისტების მოძებნა იქნება რთული.

თქვით, რომ ტელევიზიის ბიუჯეტის გაზრდას გეგმავთ. ფიქრობთ, რომ შეძლებთ საზოგადოებრივი მაუწყებელი დაითანხმოთ უკვე დაწესებული პროცენტის გაზრდაზე?

ვიცი, რომ რაც არის საქართველოს მაუწყელობის შესახებ კანონით გათვალისწინებული, აქედან მინიმუმს რიცხავენ. ეს ახსნეს იმით, რომ აჭარის ტელევიზიასა და რადიოს არ გააჩნია სტრატეგიის დოკუმენტი, არ არის მკაფიოდ გააზრებული ბიუჯეტის საჭიროებები, ბიუჯეტი არ არის მუხლობრივი და არ მოიცავს ახსნა-განმარტებებს _ შესაბამისი დასაბუთება არ აქვს. ვაპირებ შევიმუშავო მოკლევადიანი და გრძელვადიანი სტრატეგიები.

თქვენ დასვით კითხვა „უჩინარ“ ადამიანებზე. ამოცანების შესრულების ხარისხთან დაკავშირებით, პროცენტულობასთან დაკავშირებით, აუცილებლად ვიმუშავებთ მრჩეველთა საბჭოსთან – ამაზე გვექნება ძირითადი აქცენტები. შეკითხვებს ექნება არგუმენტირებული პასუხები. ვფიქრობ, შემცირდება ეჭვები და კრიტიკული დამოკიდებულება. მე მაქვს მოლოდინი, რომ ეს აისახება კიდეც ბიუჯეტზე. ამის საჭიროება ნამდვილად არის ორგანიზაციაში, თუმცა მე მაქსიმალურად უნდა დავასაბუთო ხარჯების აუცილებლობა.

როგორ ფიქრობთ, დღეს აჭარის ტელევიზია, როგორც საზოგადოებრივი მაუწყებელი, საზოგადოების დაკვეთას პასუხობს? თუ ამ კუთხით რაიმე არის შესაცვლელი?

ჩვენ ვეყრდნობით რეიტინგის შედეგებს. დიდი ხანი არ არის, რაც რეიტინგების დაკვეთა დაიწყო საზოგადოებრივი მაუწყებლის აჭარის ტელევიზიამ და რადიომ. ამ დრომდე საზოგადოებრივ არხებში დასაქმებული ადამიანები ფიქრობდნენ, რომ რეიტინგი არ არის განმსაზღვრელი და მთავარია ნდობა. თუმცა, რა თქმა უნდა, ნდობის კოეფიციენტი არის ისევ და ისევ რეიტინგი.
დღევანდელი რეიტინგის მაჩვენებლით ვერ ვიტყვით, რომ საზოგადოების ნდობას და ყურადღებას იმსახურებს არხი, ვერ ვიტყვით, რომ ვიდეოებს ან მასალებს, რომლებიც განთავსებულია, ძალიან დიდი ნახვები აქვს. აქცენტს ვაკეთებ არამხოლოდ სატელევიზიო რეიტინგზე, არამედ ელექტრონულ მედიაში, სოციალურ ქსელებში გავრცელებულ ინფორმაციაზე.
თუნდაც ერთი სლოგანი, ჩვენ ვმუშაობთ საზოგადოებისთვის, აბსოლუტურად ცვლის მოცემულობას. როდესაც დავაზუსტებთ იმას, რომ თითოეული ჩვენთაგანის სამუშაო კომპიუტერი შეძენილია მოქალაქეების მიერ, გათბობის სისტემა დამოკიდებულია ადამიანების გადასახდებზე, რომელსაც ისინი ჯიბიდან იღებენ და ამას ერთმანეთს კიდევ ერთხელ შევახსენებთ, ვფიქრობ, სოციალური პასუხიმგებლობა წინ თავისთავად წამოიწევს.

ნეტგაზეთის მასალების სხვა გამოცემებში გადაბეჭდვის წესი
ავტორი