ავტომობილის და მოტოციკლის შიდა ტრანზიტის ნომრები 2026 წლის 1-ლი მარტიდან შეიცვლება. ახალი ნიმუშები „ოცნების“ მთავრობამ 2025 წლის 26 დეკემბრის დადგენილებით დაამტკიცა.
ფაქტობრივად სიახლეა ის, რომ შემოდის შიდა ტრანზიტის ახალი ნომრები [განსხვავება იქნება – ლურჯი ზოლი წითელის ნაცვლად], დღეს არსებული „შიდა ტრანზიტის და ტრანზიტული“ [წითელზოლიანი] ნომრები კი, მხოლოდ „ტრანზიტულ“ ნომრებად დარჩება.
ამასთან, ტრანზიტული ნომრების გაცემის საფასური 2026 წლის პირველი იანვრიდან გაძვირდა და 50 ლარის ნაცვლად 370 ლარი გახდა.
სატრანზიტო ნომრების ნიმუშები დადგენილებიდან, რომელიც 2026 წლის 1-ლი მარტიდან უნდა შევიდეს ძალაში:
ავტომობილის შიდა ტრანზიტის და ტრანზიტული ნომრის ნიმუშები
მოტოციკლის შიდა ტრანზიტის და ტრანზიტული ნომრის ნიმუშები
შსს-ს მომსახურების სააგენტოს დაევალა ახალი ნიმუშების სატრანსპორტო საშუალებათა შიდა ტრანზიტის დამზადებისათვის/გაცემისათვის საჭირო ორგანიზაციული ღონისძიებების განხორციელება 2026 წლის 1-ელ მარტამდე.
„2026 წლის 1 მარტამდე გაცემულ და იურიდიული ძალის მქონე ძველი ნიმუშის შიდა ტრანზიტს იურიდიული ძალა შეუნარჩუნდეს საქართველოს კანონმდებლობით განსაზღვრული მისი მოქმედების ვადით.“ – აღნიშნულია დადგენილებაში.
2026 წლის პირველი იანვრიდან კი ამოქმედდა არალეგიტიმური პარლამენტის მიერ დამტკიცებული კანონი, რომლის მიხედვითაც ტრანზიტული ნომრის გაცემა 370 ლარი ღირს.
ამ თემაზე:
ტრანზიტული ნომრის გაცემა 370 ლარი ეღირება 50-ის ნაცვლად – ცვლილებების პროექტი
