Batumelebi | ქობულეთი უწყვეტი წყალმომარაგების გარეშე ქობულეთი უწყვეტი წყალმომარაგების გარეშე – Batumelebi
RU | GE  

ქობულეთი უწყვეტი წყალმომარაგების გარეშე

ქალაქი ქობულეთი 60 ლიტრი სატრანსფორმატორო ზეთის გამო უწყვეტი წყალმომარაგების გარშეა დარჩენილი. შპს „ქობულეთის წყალის“ მიერ შესყიდვების სააგენტოში გაგზავნილ წერილში აღნიშნულია, რომ 8 ჭაბურღილიდან ამჟამად მუშაობს მხოლოდ 2, რაც „ვერ უზრუნველყოფს ქალაქს სასმელი წყლით უწყვეტი მომარაგებით“.

„ქობულეთის წყალი“-ს სათავე ნაგებობაზე გაგვაჩნია 8 ერთეული ჭაბურღილი, რომელზეც დამონტაჟებულია 120 კუბ. მ. ტუმბო, რომელზეც დამოტაჟებულია 32 კილოვატიანი ელექტრო ძრავები. აღნიშნულ ძრავებს ელ. ენერგია მიეწოდება 2 ძალოვანი 250 კვა 10/04 სიმძლავრის ტრანსფორმატორით, რომელთაგან ერთ-ერთი 2016 წლის 13 ოქტომბერს გამოვიდა მწყობრიდან და სასწრაფოდ საჭიროებს ზეთის დამატებას“ – ამ შინაარსის წერილით კომპანიამ შესყიდვების სააგენტოს 20 ოქტომბერს მიმართა და 60 ლიტრი სატრანსფორმატორო ზეთის, ტენდერის გარეშე, პირდაპირი შესყიდვის ნებართვა ითხოვა.

„ქობულეთის წყალი“ აცხადებს, რომ ტრანსფორმატორი შემოწმებული იყო შესაბამისი კომპეტენტური ლაბორატორიის მიერ, რითაც დადგინდა რომ იმ დროისათვის ტრანფორმატორი იყო გამართული და მუშაობდა ნორმალურად, აქედან გამომდინარე ვერ განსაზღვრავდნენ აღნიშნულ პრობლებას: „2016 წლის 13 ოქტომბერს, შევადგინეთ დეფექტური აქტი, მოვიძიეთ სავარაუდო მიმწოდებელი, რომელმაც წარმოგვიდგინა ინვოისი და ხელშეკრულების გაფორმების შემთხვევაში მოგვაწვდის ტრანსფორმატორის ზეთს 1-2 დღის განმავლობაში“.

სააგენტოს პასუხის ვადა დღეს ეწურება. თანხმობის შემთხვევაში „ქობულეთის წყალი“ 60 ლიტრ სატრანსფორმატორო ზეთს 360 ლარად შეისყიდის.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com