Batumelebi | მობილური ტელეფონის ძარცვის საქმე ბათუმის სასამართლოში მობილური ტელეფონის ძარცვის საქმე ბათუმის სასამართლოში – Batumelebi
RU | GE  

მობილური ტელეფონის ძარცვის საქმე ბათუმის სასამართლოში

მოსამართლე დავით მამისეიშვილი 24 წლის გიორგი ა.-ს საქმეს განიხილავს. მას გამოძიება მობილური ტელეფონის ძალადობრივად მისაკუთრებას ედავება. იმის გამო, რომ ბრალდებული პირობითი მსჯავრის ქვეშ უკვე იმყოფება, მას სავარაუდოდ 5-დან 8 წლამდე თავისუფლების აღკვეთა ელოდება ახალი დანაშაულისთვის.

“ცნობთ თუ არა თავს დამნაშავედ?” – მოსამართლის შეკითხვას სასამართლო დარბაზში ბრალდებულმა დადებითი პასუხი გასცა. იგი წინასწარ პატიმრობაში არ იმყოფება. მოსამართლემ გიორგი ა.-ს აუხსნა, რომ მძიმე კატეგორიის დანაშაულის ჩადენაში ედება ბრალი და საპროცესო შეთანხმების მიღწევა მხოლოდ საქართველოს მთავარი პროკურორის, ან მისი მოადგილის თანხმობის შემთხვევაშია შესაძლებელი.

გამოძიების ვერსიით, ბრალდებულმა პუშკინის ქუჩაზე ღამით iPhone6 სისტემის მობილური ტელეფონი წაართვა გოგოს და მიიმალა. დაზარალებულმა დახმარებისთვის პოლიციას მიმართა. ადვოკატ ნონა დუმბაძის თქმით, ბრალდებულმა მეორე დღეს თავად დაუბრუნა მობილური ტელეფონი დაზარალებულს: „გოგოს გაცნობას ცდილობდა და ჩათვალა, რომ ასე მოახერხებდა დაახლოვებას. რადგან გოგო არ შეეხმიანა, მეორე დღეს ტელეფონი თავად დაუბრუნა.“

საქმეში 16 მოწმეა წარმოდგენილი, თუმცა მათი დაკითხვა მოსამართლე დავით მამისეიშვილმა გადადო. მან ადვოკატის შუამდგომლობა დააკმაყოფილა, რომელმაც თქვა, რომ საპროცესო შეთანხმებისთვის მოთხოვნით პროკურატურას უკვე მიმართა და დრო სჭირდება. ადვოკატის მოთხოვნას პროკურორი რომეო ტყაბლაძეც დაეთანხმა.

ნეტგაზეთის მასალების სხვა გამოცემებში გადაბეჭდვის წესი
ავტორი