გერმანიის კანცლერი ფრიდრიხ მერცი არ გამორიცხავს, რომ მისი მთავრობა უკრაინას TAURUS-ის შორ მანძილზე მოქმედ ფრთოსან რაკეტებს მიაწვდის.
„რა თქმა უნდა, ეს შესაძლებელია“, – ციტირებს გერმანული გამოცემა „დოიჩე ველე“ მერცს, რომელმაც ამ თემაზე 28 მაისს ტელეარხ ZDF-ის ეთერში ისაუბრა.
მისი თქმით, რაკეტების მიწოდება ექვს თვეში ან ერთ წელიწადში „უკრაინას დღეს ვერ დაეხმარება“, ამიტომ ბერლინი უკვე აძლიერებს კიევის სამხედრო მხარდაჭერას.
ამავდროულად, გერმანიის კანცლერმა აღნიშნა, რომ TAURUS-ის მიწოდების შემთხვევაში უკრაინელი სამხედრო პერსონალის რამდენიმეთვიანი წვრთნა იქნება საჭირო.
გერმანიის კანცლერმა, ფრიდრიხ მერცმა ბერლინში უკრაინის პრეზიდენტი ვოლოდიმირ ზელენსკი მიიღო. მათი შეხვედრის შემდეგ გამოცხადდა, რომ გერმანია მხარს დაუჭერს უკრაინას შორი დისტანციის იარაღის მოპოვებაში. თავის მხრივ, ზელენსკიმ გერმანულ ტელეარხ RTL-თან ინტერვიუში განაცხადა, რომ მერცთან მოლაპარაკებები TAURUS-ის მიწოდებას ეხებოდა.
„ყოველი კვირის შემდეგ უკრაინა სულ უფრო ხელსაყრელ მდგომარეობაში აღმოჩნდება, მათ შორის თავდაცვის შესაძლებლობის თვალსაზრისით“, – განაცხადა მერცმა ZDF-ის ეთერში. ამავდროულად, მან ხაზგასმით აღნიშნა, რომ „ომის დასრულების გასაღები“ რუსეთშია. „თუ რუსეთი დღეს ცეცხლს შეწყვეტს, ომი დღეს საღამოს დასრულდება“, – თქვა მერცმა.
უკრაინა ორ წელზე მეტია გერმანიასთან მოლაპარაკებებს მართავს TAURUS-ის მიწოდებაზე.
Taurus-ის რაკეტა არის ბრიტანულ-ფრანგული Storm Shadow-ს გერმანულ-შვედური ანალოგი, მისი გაშვება შესაძლებელია უკრაინის შეიარაღებულ ძალების საბრძოლო თვითმფრინავებიდან და განსაკუთრებით ეფექტურია აეროდრომების, ბუნკერების, იარაღის საწყობების და სამრეწველო ობიექტების დარტყმისთვის. TAURUS-ს შეუძლია დაარტყას სამიზნეებს 500 კილომეტრის დაშორებით.
