სააგენტო „როიტერსი“ იუწყება, რომ მათთვის ცნობილი გახდა პირობები, რასაც რუსეთის პრეზიდენტი პუტინი უკრაინაში ომის შეწყვეტის სანაცვლოდ აყენებს – პუტინს უნდა, დასავლელმა ლიდერებმა წერილობით დადონ პირობა, რომ შეწყვეტენ ნატოს აღმოსავლეთისკენ გაფართოებას და მოხსნიან რუსეთის წინააღმდეგ დაწესებული სანქციების ნაწილს.
„როიტერსი“ ინფორმაციას ავრცელებს სამ რუსულ წყაროზე დაყრდნობით, რომლებიც ინფორმირებულნი არიან მოლაპარაკებების შესახებ.
გასულ კვირას აშშ-ის პრეზიდენტთან, ტრამპთან ორსაათიანი სატელეფონო საუბრის შემდეგ პუტინმა განაცხადა, რომ დათანხმდა უკრაინასთან მემორანდუმზე მუშაობას, რომელიც დაადგენდა სამშვიდობო შეთანხმების კონტურებს, მათ შორის, ცეცხლის შეწყვეტის ვადებს. რუსეთი აცხადებს, რომ ამჟამად მემორანდუმის საკუთარ ვერსიას ამზადებს და წინასწარ ვერ აფასებს, რა დრო დასჭირდება ამას.
„პუტინი მზადაა მშვიდობის დასამყარებლად, მაგრამ არა ნებისმიერ ფასად“, – აქვეყნებს „როიტერსი“ ერთ-ერთი მაღალჩინოსანი რუსული წყაროს ციტატას, რომელიც იცნობს კრემლის პირველ პირებს და რომელმაც საინფორმაციო სააგენტოსთან ანონიმურობის პირობით ისაუბრა.
„სამი რუსული წყაროს თქმით, პუტინს სურს „წერილობითი“ პირობა დასავლეთის მთავარი ძალებისგან, რომ არ გააფართოონ აშშ-ის ხელმძღვანელობით NATO-ს ალიანსი აღმოსავლეთისკენ – ანუ გამორიცხოს უკრაინის, საქართველოს, მოლდოვისა და სხვა ყოფილო საბჭოთა რესპუბლიკების წევრობა“ – წერს „როიტერსი“.
რუსეთს ასევე სურს, რომ უკრაინა იყოს ნეიტრალური, მოიხსნას დასავლური სანქციების ნაწილი, მოგვარდეს/გადაწყდეს დასავლეთში გაყინული რუსული სუვერენული აქტივების საკითხი და უზრუნველყოფილი იყოს უკრაინაში რუსულენოვანი მოსახლეობის დაცვა – წერს იმავე სამ წყაროზე დაყრდნობით სააგენტო.
„როიტერსთან“ საუბრისას ერთ-ერთი ანონიმური წყარო ამბობს, რომ თუ პუტინი ბრძოლის ველზე დაინახავდა ტაქტიკურ შესაძლებლობას, ის უკრაინაში უფრო ღრმად შეიჭრებოდა. მისივე თქმით, კრემლი თვლის, რომ რუსეთს შეუძლია იბრძოლოს წლების განმავლობაში მიუხედავად დასავლეთის მიერ დაკისრებული სანქციებისა და ეკონომიკური სირთულეებისა.
მეორე წყაროს ცნობით, პუტინი რჩება თავის საჯარო პოზიციაზე, რომლის მიხედვითაც მას სურს აღმოსავლეთ უკრაინის ოთხივე რეგიონი, რომელზედაც პრეტენზია აქვს რუსეთს.
