რუსეთის პრეზიდენტის მრჩეველი, ანტონ კობიაკოვი ირწმუნება, რომ სსრკ დაიშალა სამართლებრივი პროცედურების დარღვევით. შესაბამისად, იურიდიულად ის აგრძელებს არსებობას.
„სსრკ ხომ სადღაც იურიდიულად ისევ არსებობს და აგრძელებს არსებობას, რასაც დიდი ხანია, ჯერ კიდევ 90-იანი წლებიდან, ამბობენ კონსტიტუციური სამართლის სპეციალისტები, მათ შორის დასავლეთის ქვეყნებიდან, საფრანგეთიდან, აშშ-დან. ამას იმიტომ ამბობენ, რომ დარღვეული იყო სსრკ-ს ე.წ. დაშლის პროცედურა“, – თქვა მან პეტერბურგის საერთაშორისო სამართლებრივი ფორუმის დასკვნით პრესკონფერენციაზე გამოსვლისას.
კობიაკოვის განმარტებით, საბჭოთა კავშირი უნდა დაშლილიყო იმავე დეპუტატთა კონგრესის გადაწყვეტილებით, რომელმაც ის ჩამოაყალიბა.
„თუ სახალხო დეპუტატთა კონგრესმა, რომელიც ასევე ცნობილია როგორც საბჭოთა კავშირის კონგრესი, შექმნა სსრკ 1922 წელს, მაშინ ის უნდა დაშლილიყო იმავე დეპუტატთა კონგრესის გადაწყვეტილებით. ხოლო თუ სამართლებრივი პროცედურა დაირღვა, მაშინ გამოდის, რომ სსრკ იურიდიულად არსებობს, ასე ამბობენ კონსტიტუციური სამართლის ექსპერტები“, – თქვა კობიაკოვმა.
„თუ სსრკ არ დაიშალა, მაშინ ლოგიკურად, სამართლებრივი თვალსაზრისით, გამოდის, რომ უკრაინის კრიზისი შიდა პროცესია“, – ციტირებს პროპაგანდისტული გამოცემა ტასი პუტინის მრჩეველს. კობიაკოვმა დასძინა, რომ „სსრკ-ის დაშლას სათანადო სამართლებრივი შეფასება უნდა მიეცეს [კონსტიტუციური სამართლის ექსპერტების მიერ] მიმდინარე მოვლენების გასაგებად“.
მთავარ ფოტოზე: კადრი პეტერბურგის საერთაშორისო სამართლებრივი ფორუმის დასკვნით პრესკონფერენციიდან.
ამავე თემაზე:
„ახალი ერეკლე მეფეები ისევ მუხლებზე დაჩოქილები შეეხვეწებიან დედა რუსეთს“ – სიმონიანი საქართველოზე
