ახალგაზრდა იურისტთა ასოციაციის განცხადებით, „უცხოეთის აგენტების რეგისტრაციის აქტი“ საკონსტიტუციო სასამართლოში გასაჩივრდა.
საიას თავმჯდომარის, ნონა ქურდოვანიძის განცხადებით, ამ კანონის ამოქმედება აყენებს მყისიერ საფრთხეს ორგანიზაციებისა და ინდივიდებისთვის, რადგან ეს ორგანიზაციები და ინდივიდები შესაძლოა უსაფუძვლოდ მოაქციონ კანონის რეგულირების ფარგლებში.
შესაბამისად, არსებობს იმის აუცილებელი პირობა, რომ ეს სარჩელი განხილული იყოს სწრაფად და საკონსტიტუციო სასამართლომ შეაჩეროს გასაჩივრებული ნორმები. სწორედ ამ მოთხოვნით არის წარდგენილი ეს სარჩელი“ – განაცხადა ნონა ქურდოვანიძემ დღეს, 22 მაისს, ბრიფინგზე.
მისი თქმით, „ქართული ოცნება“ ამბობს, რომ თითქოს ეს კანონი არის ამერიკული „ფარას“ პირდაპირი თარგმანი, მაგრამ საზოგადოებამ უნდა იცოდეს, რომ კანონის პირდაპირი თარგმნა არ ნიშნავს იმას, რომ ის ანალოგიურად გამოიყენება სხვა სივრცეში, სხვა სამართლებრივ სისტემაში და სხვა პოლიტიკურ კონტექსტში.
„აშშ-ში ანალოგიური კანონი ასე არ მოქმედებს, იქ კანონი არ ებრძვის დამოუკიდებელ ორგანიზაციებს, ინდივიდებს, რომლებიც საკუთარი ორგანიზაციული საქმიანობიდან გამომდინარე მოიპოვებენ დაფინანსებას და საკუთარი დამოუკიდებელი საქმიანობის ფარგლებში განკარგავენ მას.
იმ პოლიტიკურ კონტექსტში, სადაც ჩვენ ვიმყოფებით, აშკარაა ის მიზანი, რომელიც ამოძრავებს ქართულ ოცნებას, რომ სამოქალაქო და მედიაორგანიზაციები, ასევე ფიზიკური პირები შეზღუდონ სხვადასხვა ფორმით და ამ კანონის მიღებაც ამას ემსახურება.
ამ კანონის ბუნდოვანი შინაარსი, ასევ, განუჭვრეტელი ძალაუფლების მინიჭება ანტიკორუფციული ბიუროსათვის, აჩენს იმის რისკებს, რომ ეს კანონი გამოყენებული იქნება რეპრესიულად“- ამბობს ნონა ქურდოვანიძე.
მისი თქმით, აქედან გამომდინარე, საქართველოს საკონსტიტუციო სასამართლო ვალდებულია ეს კანონი შეაჩეროს, მისი მოქმედება შეაჩეროს.
„ჩვენ, რა თქმა უნდა, არ ვთვლით, რომ საკონსტიტუციო სასამართლო მაღალ ნდობას იმსახურებს და აუცილებლად დააკმაყოფილებს ჩვენს მოთხოვნას, მაგრამ ეს არ ნიშნავს იმას, რომ ჩვენ უარი უნდა ვთქვათ ჩვენთვის მონიჭებული კონსტიტუციური უფლებების დაცვაზე.
ამ სარჩელით საკონსტიტუციო სასამართლო კიდევ ერთხელ გვინდა დავაფიქროთ მათ მთავარ მისიაზე, რომ მათ პირველ რიგში უნდა დაიცვან კონსტიტუცია და ამ საქმის განხილვით და დაკმაყოფილებით მათ შეუძლიათ ეს მისია შეასრულონ“ – განაცხადა ნონა ქურდოვანიძემ.
