რუსული და უკრაინული მედიის ცნობით, რუსეთსა და უკრაინას შორის მოლაპარაკებები, რომლის მთავარი თემაც ცეცხლის შეწყვეტა შეიძლება იყოს, სტამბოლში 16 მაისს გაიმართება.
15 მაისს, საღამოს, უკრაინის პრეზიდენტმა ვოლოდიმირ ზელენსკიმ დაამტკიცა უკრაინის დელეგაციის შემადგენლობა სტამბოლში რუსეთთან მოლაპარაკებებისთვის.
ცნობილია, რომ უკრაინის დელეგაციას უხელმძღვანელებს უკრაინის თავდაცვის მინისტრი რუსტამ უმეროვი. 12-კაციან დელეგაციაში შედიან სერგეი კისლიცა – უკრაინის საგარეო საქმეთა მინისტრის პირველი მოადგილე; ოლექსანდრ პოკლადი – უკრაინის უსაფრთხოების სამსახურის თავმჯდომარის მოადგილე; ოლეგ ლუგოვსკოი – საგარეო დაზვერვის სამსახურის თავმჯდომარის პირველი მოადგილე; ალექსეი შევჩენკო – უკრაინის შეიარაღებული ძალების გენერალური შტაბის უფროსის მოადგილე და სხვა უწყებების წარმომადგენლები, ძირითადად უფროსის მოადგილეები.
რაც შეეხება რუსეთის დელეგაციას, მას პუტინის მრჩეველი, ვლადიმერ მედინსკი ხელმძღვანელობს.
11 მაისს ზელენსკიმ პუტინს პირისპირ შეხვედრა შესთავაზა თურქეთში, თუმცა თურქეთში არც პუტინი ჩავიდა და არც სერგეი ლავროვი.თურქეთში იმყოფება ვოლოდიმირ ზელენსკი. მან 15 მაისს რუსეთის დელეგაციას „დეკორატიული“ უწოდა.
