„57 წლის კაცი ვარ, ჩემი სიცოცხლის მანძილზე არ მინახავს და არც არავისგან გამიგია, ქართველებსა და ვაინახებში და საერთოდ, კავკასიურ ერებში, რომ კაცი ჩიოდეს, ქალმა სილა გამაწნა და მეტკინაო.
ამას რას მოვესწარით?“- წერს მალხაზ მაჩალიკაშვილი ფეისბუქზე.
ის სოლიდარობას უცხადებს ,,ბათუმელების” მენეჯერს, მზია ამაღლობელს, რომელიც სამზე მეტი თვეა რეჟიმის პატიმარია.
გუშინ, 8 მაისს, მზია ამაღლობელის მორიგი სასამართლო პროცესი გაიმართა, სადაც ბათუმის პოლიციის უფროსი ირაკლი დგებუაძე დაიკითხა.
მან სასამართლო სხდომაზე არაერთხელ გაიმეორა, რომ ლოყა აუწითლდა და ეტკინა, სილის გაწვნის შემდეგ.
მალხაზ მაჩალიკაშვილი თემირლან მაჩალიკაშვილის მამაა. თემირლანი 2018 წლის 26 დეკემბერს პანკისში ჩატარებული სპეცოპერაციის დროს შუბლის არეში დაჭრეს. იგი 19 წლის იყო. თემირლანი ამ სროლის შედეგად დაიღუპა.
მალხაზ მაჩალიკაშვილი წლებია იბრძვის იმისთვის, რომ ჩატარდეს გამოძიება და დაისაჯონ პირები, ვისი ბრძანებითაც ესროლეს მის მძინარე შვილს საწოლში. ოჯახისა და უფლებადამცველი ორგანიზაციების ნაწილის განცხადებით, თემირლან მაჩალიკაშვილის წინააღმდეგ დაირღვა არაერთი უფლება, მათ შორის სიცოცხლის უფლებაც. ისინი საქმის ხელახალ გამოძიებასა და დამნაშავეების დასჯას ითხოვენ.
