„ეს ემსახურება შოუს დადგმას“ – 8 მაისს, ბათუმის საქალაქო სასამართლოში, მზია ამაღლობელის პროცესზე შოუს დადგმის მცდელობა უწოდა პროკურორმა თორნიკე გოგეშვილმა ვიდეოს, რომელშიც მალხაზ ირემაძე, პროევროპული აქციების ერთ-ერთი მონაწილე, ბათუმის პოლიციის უფროსის, ირაკლი დგებუაძის მხრიდან მის მიმართ ჩადენილ ძალადობაზე ჰყვება.
მალხაზ ირემაძის თქმით, მასზე პირადად ირაკლი დგებუაძემ პოლიციის შენობაში იძალადა.
ზოგადად, პროკურორი თორნიკე გოგეშვილი სასამართლო სხდომებზე სიმშვიდეს ვერ ინარჩუნებს, როცა მოწმე პოლიციელებს უჭირთ პასუხების გაცემა, ადვოკატები მათ ურთიერთგამომრიცხავი ინფორმაციის გავრცელებაში გამოიჭერენ, ან პოლიციელების მხრიდან ძალადობაზეა საუბარი.
8 მაისს პროკურორს დისკომფორტი არ შეჰქმნია, როცა თავად ბათუმის პოლიციის უფროსი ჰყვებოდა ვრცლად და დეტალურად, როგორი მეგობრული ურთიერთობა ჩამოუყალიბდა ბათუმის პროევროპული აქციების მონაწილეებთან. გოგეშვილს არ უთქვამს, ეს საქმესთან კავშირში არ არისო, სამაგიეროდ განრიდება მოითხოვა მაშინ, როცა მზია ამაღლობელის დაცვის მხარის მოთხოვნით სასამართლო სხდომაზე აჩვენეს ვიდეო, სადაც აქციების მონაწილეები ჰყვებიან, როგორ იძალადა მათზე თავად პოლიციის უფროსმა ირაკლი დგებუაძემ მათი დაკავების შემდეგ, პოლიციის შენობაში.
რატომ არ უნდა ჰკითხონ აქციებზე დაკავებულების ბრალდებებზე ირაკლი დგებუაძეს, ამასთან დაკავშირებით გოგეშვილმა სასამართლოს განუმარტა:
„მოვუსმინეთ ცოტა ხანი და ვცადეთ, იქნებ გაგვეგო, რა სურდა დაცვის მხარეს. როგორც ვხვდები, აქ დაკითხვის ფორმატთან არ მივდივართ და იმასთან, რომ მოწმისგან რაიმე მნიშვნელოვანი ინფორმაცია მივიღოთ, მათ შორის ვიდეოჩანაწერის წარდგენით უფრო გაგვიმარტივდეს გარკვეული ინფორმაციის წარდგენა.
სანამ ამ ვიდეო ჩანაწერს წარუდგენდა, დაცვის მხარე შეეკითხა [დგებუაძეს], ჯერ თავად ამ პირთან [მალხაზ ირემაძესთან] მიმართებით ხომ არ ჰქონია მსგავს ქმედებებს ადგილი და კონკრეტული კითხვები იყო დასმული, მათ შორის კონკრეტულ ლოკაციებზე დაზიანება თუ მიაყენა, უარყო დასაკითხმა პირმა და ისიც კი დაურთეს სიტყვას, რატომ შეიძლება გაბრალებდეს მაშინო და მან თქვა, რომ არ აქვს ინფორმაცია“ – განაცხადა პროკურორმა სხდომაზე.
თორნიკე გოგეშვილი, მზია ამაღლობელის საქმის პროკურორი
გოგეშვილის თქმით, ვიდეოჩანაწერების წარმოდგენა, რომელზეც დგებუაძისგან დაზარალებული პირები ძალადობაზე საუბრობენ, მოწმისგან ინფორმაციის მიღებას ვერ უზრუნველყოფს.
„მე ნანახი მაქვს ეს კადრი, ეს კაცი ჰყვება ილმაზთან დაკავშირებით [თემურ ქათამაძე] არასათანადო მოპყრობის კონკრეტულ შემთხვევაზე, რომელიც დასაკითხმა პირმა, ბატონმა ირაკლიმ, უკვე ამოწურა ის საკითხი. უარყო ზოგადად ძალადობა და კონკრეტული შეკითხვებიც იყო დასმული, ახლა რომ გავაგრძელოთ და დავასრულოთ ამ ვიდეოს ყურება, რა შეკითხვა უნდა დაისვას… ვიდეოს წარდგენას რა მიზანი აქვს?! აქედან გამომდინარე …“ – პროკურორს უნდა ეთქვა, განრიდებას ვითხოვო, თუმცა ამ დროს მას მზია ამაღლობელის ადვოკატმა, მაია მწარიაშვილმა შეაწყვეტინა სიტყვა:
„ზუსტად ამის მოსმენა მინდოდა ბრალდების მხარიდან ქალბატონო მოსამართლევ, რადგან სწორედ ეს აჩვენებს, რა რა ხდება აქ“- მიმართა ადვოკატმა მოსამართლე ნინო სახელაშვილს.
მაია მწარიაშვილმა სასამართლოს პროკურორის ბრალდებასთან დაკავშირებით განუმარტა:
„ეს აჩვენებს რა ხდება ამ პროცესზე. იმის ნაცვლად, რომ ბრალდებისთვის ეს მტკიცებულებები იყოს საფუძველი გამოძიების დაწყების და არა სადღაც გადაგდების [ეს პირები, სხვათა შორის, მოწმედ გვყავდა წარმოდგენილი და გამოკითხული ამ საქმეში].
…ამ მტკიცებულებებზე პროკურორი, ამ შემთხვევაში ბატონი ირაკლის ადვოკატი კი არ არის, სახელმწიფო ბრალმდებელია, საჯარო ინტერესს უნდა ახმოვანებდეს, თურმე ჩვენ აქ სპეკულირებას ვეწევით … ეს არის მტკიცებულებები, რასაც უკავშირდება შემდეგ სილა, ამას ვიკვლევ, ვაჩვენებ მტკიცებულებას მოწმეს და პროკურორი ამბობს, რას ემსახურება ესო.
გასაგებია, როგორც მიდის გამოძიება ამ საქმეებზე. სახელმწიფო ბრალდება ასე დემონსტრირებდეს, რომ არ აინტერესებს ადამიანებზე ძალადობა, მაშინ როდესაც, კიდევ ვამბობ, ყველა ეს ეპიზოდი ამ საქმის ნაწილია, რატომ უნდა დავუჯერო მარტო ადმინისტრაციულ სამართალდარღვევათა ოქმს. ადამიანი ჰყვება, თან თვითონ არის მოწმე სხვა ძალადობის და ვეკითხები ბატონ ირაკლის“.
სხვათა შორის პროკურორი ხშირად აპელირებს თავის გამოსვლაში, რომ არ მოუსმენია ბრალდებულის, მზია ამაღლობელის დამოკიდებულება იმასთან დაკავშირებით, რაც ჩაიდინა. ის სილის გაწვნას გულისხმობს. „მოძალადეს ბოდიშს არ უხდიან“ – ასე უპასუხა მას მზია ამაღლობელმა ერთ-ერთ სხდომაზე. პროკურორმა თქვა, რომ ამას არ გულისხმობდა და ასე არც ფიქრობს, თუმცა არ დაუკონკრეტებია, რას ფიქრობს.
8 მაისს მალხაზ ირემაძის ვიდეოსთან დაკავშირებით კითხვების განრიდებას მეორე პროკურორიც ითხოვდა:
„განვარიდოთ ეს შეკითხვა, არ ეხება საქმეს… ამ საქმესთან დაკავშირებით, მოგეხსენებათ, მიმდინარეობს გამოძიება და თუ რაიმე გამოიკვეთება, შესაბამისი რეაგირებაც გვექნება. ვშუამდგომლობ, რომ ეს კითხვა განვარიდოთ“ – თქვა პროკურორმა შოთა ჩხაიძემ.
ადვოკატმა მაია მწარიაშვილმა სასამართლოს განუმარტა, რომ ვიდეოსთან დაკავშირებით კითხვები აქვს, შესაბამისად სასამართლო სხდომაზე გააგრძელეს ვიდეოს ჩვენება და აჩვენეს აქციების სხვა მონაწილეების ვიდეოებიც, სადაც ისინი ძალადობასა და შეურაცხყოფაში ირაკლი დგებუაძეს სდებენ ბრალს.
ირაკლი დგებუაძემ მისი მხრიდან აქციის მონაწილეებზე ძალადობა უარყო.
ადვოკატმა მაია მწარიაშვილმა მას ჰკითხა, ხომ არ იცის, რატომ აბრალებენ მას ეს პირები ძალადობას, რაზეც ირაკლი დგებუაძემ უპასუხა, რომ არ იცის.
- ამავე თემაზე:
„რა ზიანი მოგაყენეთ?“ – რეპორტაჟი მზია ამაღლობელის სასამართლო პროცესიდან
