ნიჟნი ნოვგოროდის სასამართლომ, რუსეთის ჯარის დისკრედიტაციაში ბრალდებულ ორ სკოლის მოსწავლეს, სასჯელის სახით 2.5 წლით თავისუფლების აღკვეთა მიუსაჯა. მოსწავლეები პოლიციაში სკოლის დირექტორმა დაასმინა.
2023 წლის შემოდგომაზე, ლიცეუმის დირექტორმა ნინა გოვოროვამ პოლიციას შეატყობინა, რომ მისი სკოლის ორმა მოსწავლემ რუსული არმიის შესახებ გადაიღო ვიდეო „ფეიკებით“ [სიყალბეებით]. სკოლის მოსწავლეების წინააღმდეგ მაშინვე აღიძრა ადმინისტრაციული საქმე, რომელიც სასჯელის სახით 50 000 რუბლამდე ჯარიმას ითვალისწინებდა. მაგრამ როდესაც მოსწავლეებს 18 წელი შეუსრულდათ – 2024 წლის აგვისტოში, ამ „ფეიკებისთვის“ მათ წინააღმდეგ სისხლის სამართლის საქმეც აღიძრა.
საქმე განიხილეს და 2025 წლის 10 აპრილს სასამართლო მათ დაპატიმრების გადაწყვეტილება მიიღო. მოზარდებს სასჯელს კოლონიაში მოიხდიან.
ნიჟნი ნოვგოროდის საინფორმაციო გვერდის „Reporter-NN“ ცნობით, სკოლის დირექტორმა ძალოვნებს განუცხადა, რომ სკოლის ელექტრონულ მისამართზე მიღო წერილი ვიდეოსთან ერთად, რომელშიც ლიცეუმის ორი უფროსკლასელი, სამზარეულოში განიხილავდნენ უკრაინასთან ომს, „მას არ მოეწონა ის ფაქტი, რომ ვიდეოში მოსწავლეები თითქოს აკრიტიკებდნენ რუსეთის არმიას“, – წერს გამოცემა.
ახალგაზრდების წინააღმდეგ საქმე აღიძრა Youtube-ს პლატფორმაზე გამოქვეყნებული და შემდეგ Telegram-ის არხზე გაზიარებული ვიდეოსთვის, რომელსაც 26 გამომწერი ჰყავს. ვიდეომ სულ 35 ნახვა დააგროვა.
სასამართლოზე ერთ-ერთი ბრალდებული იგორ სტარშინოვი ჰყვება, რომ ვიდეოს ჩაწერა ისტორიის გაკვეთილის შემდეგ გადაწყვიტეს. „მას შემდეგ, რაც მე ადმინისტრაციული ჯარიმა დამეკისრა, გამოვიტანე ჩემთვის დასკვნები და გამოსწორების გზას გავდექი. ბევრჯერ მოვინანიე ჩემი, მშობლების და ასევე მასწავლებლების წინაშე“, – ამბობს ის.
„მე ჩემი ქმედებებისთვის პასუხისგებაში მიცემული ვიყავი ადმინისტრაციული სამართალდარღვევის სახით, აღრიცხვაზე ვიყავი არასრულწლოვანთა საქმეების კომისიაში, რეგულარულად ვესწრებოდი შეხვედრებს… მაშინაც მოვინანიე“, – ამბობს მეორე მოსწავლე, კირილ სმირნოვი. – „მე მაინც ვფიქრობ, რომ სასჯელი სიტყვებისთვის უნდა იყოს გაცილებით უფრო მსუბუქი, ბოლოს და ბოლოს ჩვენ ხომ არავინ გაგვიძარცვავს, არავინ დაგვიზიანებია ფიზიკურად“.
კირილ სმირნოვის დედა ამბობს, რომ სკოლის მოსწავლეებისთვის სკოლაში არც არავის აუხსნია, რომ ამ საქციელზე, კანონი ასეთ სერიოზულ სასჯელს ითვალისწინებს: „დირექტორს რა თქმა უნდა შეეძლო არ შეეტყობინებინა, ეს მისთვის არ იყო სავალდებულო, მას შეეძლო გვერდზე გადაედო რაღაც პირადი წყენები და უბრალოდ დაენდო ისინი…“.
მთავარ ფოტოზე: იგორ სტარშინოვი და კირილ სმირნოვი სასამართლოში. სქრინი გადაცემა „Кстати-ს” ვიდეორეპორტაჟიდან
