თითქმის ერთი კვირაა რაც ბათუმში N4 მუნიციპალური ავტობუსი უკუმიმართულებისას გორგილაძისა და ჯავახიშვილის ქუჩების კვეთაში არ უხვევს და ფიროსმანის ქუჩის დასაწყისში არ შედის. ავტობუსი გორგილაძის ქუჩაზე, „ბათუმი მოლიდან“ პირდაპირ აგრძელებს გზას იუსტიციის სახლამდე, ბრუნდება და შემდეგ შარტავას ქუჩით გადადის ფიროსმანის ქუჩაზე.
მარშრუტის ცვლილების შესახებ მერიის შპს „ბათუმის ავტოტრანსპორტს“ ინფორმაცია არ გაუვრცელებია. ზოგიერთი მძღოლის თქმით კი, მარშრუტის ცვლილების მიზეზი ფიროსმანის ქუჩაზე მოწყობილი სამშენებლო ღობეა, რის გამოც სავალი ნაწილი დავიწროვდა და ავტობუსებს მოძრაობა უჭირთ.
ბათუმში 4 ნომერი ავტობუსის შეცვლილი გრაფიკი – [ქალაქიდან „ხოფის ბაზრობის“ მიმართულებით ავტობუსი ჩვეული მარშრუტით [აღნიშნულია მწვანე ხაზით] აღარ მოძრაობს და ის გორგილაძის ქუჩიდან ფიროსმანზე შარტავას გამზირის გავლით გადადის [აღნიშნულია წითელი ხაზით]
„დროებითაა. ხვალიდან [22 აპრილიდან] დაუბრუნდება ჩვეულებრივ მარშრუტს“ – მოგვწერეს „ბათუმის ავტოტრანსპორტიდან“, თუმცა რა მიზეზით არის შეცვლილი მარშრუტი, ამ კითხვაზე არ გვიპასუხეს.
კომპანიის ცხელ ხაზზე კი გვითხრეს, რომ მიღებული აქვთ შეტყობინება „ალბათ მერიიდან, რომ ქუჩაა სავარაუდოდ გადათხრილი და 4 ნომერი ავტობუსი უკუმიმართულებისას ფიროსმანის ქუჩას [ჯავახიშვილსა და შარტავას მონაკვეთში] არ გამოივლის. ქალაქის მიმართულებით მოძრაობისას კი ამ მონაკვეთს ჩვეულებრივ გადის“.
ქუჩა გადათხრილი არაა. თუ ავტობუსის მძღოლების ინფორმაციას დავეყრდნობით, სამშენებლო ღობის გამო გზის სავალი ნაწილი ფიროსმანის ქუჩის 10 ნომერში მართლაც დავიწროებულია. აქ ძველი საცხოვრებელი კორპუსის დემონტაჟი მიმდინარეობს, ღობით კი მთლიანად გადაკეტილია ტროტუარი და ქვეითებისთვის დროებითი და არაადაპტირებული სავალი ნაწილი ავტომანქანების გზაზეა მოწყობილი.
ამ სავალი ნაწილის გასწვრივ კი ავტომანქანებიცაა დაპარკინგებული, რაც ტრანსპორტის მოძრაობას კიდევ უფრო ართულებს.
სამშენებლო ღობით ტროტუარი ფიროსმანის 10 ნომერთან მთლიანად გადაკეტილია / 21.04.2025
სამშენებლო ღობე და ქვეითებისთვის მოწყობილი სავალი ნაწილი ფიროსმანის ქუჩაზე / 21.04.2025
აღნიშნული ტერიტორიის მესაკუთრეები, საჯარო რეესტრის მიხედვით არიან: ამხანაგობა „ტაო“ და შპს „ცენტრალ სითი ლაინი“. „ბათუმელები“ აღნიშნულ კომპანიას ვერ დაუკავშირდა.
ღობეზე არ არის განთავსებული საინფორმაციო დაფა. აქ მხოლოდ უსაფრთხოების დაფაა გაკრული.
შემოღობილ ტერიტორიაზე მრავალბინიანი საცხოვრებელი სახლის მშენებლობის მიზნით არქიტექტურული პროექტი ბათუმის მერმა 2024 წლის აგვისტოში შეითანხმა.
სამშენებლო ღობე და ქვეითებისთვის მოწყობილი სავალი ნაწილი ფიროსმანის ქუჩაზე [მარჯვნივ] / 21.04.2025
სამშენებლო ღობე ფიროსმანის ქუჩაზე / 21.04.2025
პროექტის განმარტებითი ბარათის მიხედვით „ცენტრალ სითი ლაინმა“ აქ 45-სართულიანი საცხოვრებელი კორპუსი უნდა ააშენოს, რომელშიც დაპროექტებულია ჯამში 480 ბინა.
„შენობა ფუნქციურად შედგება სამი ნაწილისგან: სარდაფში და მიწისზეწდა IV დონეზე ავტოპარკინგია განლაგებული. I სართულზე კომერციული სივრცეებია განლაგებული, 6-45 სართულებზე განლაგებულია აპარტამენტები“ – აღნიშნულია განმარტებით ბარათში.
