Batumelebi | 119 ათასი ლარი სოციალური სახლების სოციალურად დაუცველებისგან იარაღით დასაცავად 119 ათასი ლარი სოციალური სახლების სოციალურად დაუცველებისგან იარაღით დასაცავად – Batumelebi
RU | GE  

119 ათასი ლარი სოციალური სახლების სოციალურად დაუცველებისგან იარაღით დასაცავად

ხულოს მუნიციპალიტეტის სოფელ ზედა ვაშლოვანში 72-ბინიანი საცხოვრებელი კომპლექსისა და ბათუმში, თამარის დასახლების N29-ის მიმდებარედ 58-ბინიანი საცხოვრებელი სახლის ცეცხლსასროლი იარაღით დაცვაში, აჭარის ფინანსთა და ეკონომიკის სამინისტრო 119 410 ლარს გადაიხდის.

აღნიშნულ თანხას სამინისტრო სახელმწიფო დაცვის სამსახურს გადაუხდის. შესაბამისი თანხმობა შესყიდვების სააგენტოსგან სამინისტრომ მიმდინარე წლის 16 სექტემბერს მიიღო.

„დღეის მდგომარეობით, სამშენებლო სამუშაოები დასრულებულია და მიმდინარეობს შესრულებული სამუშაოების მიღების პროცესი, რის შემდგომაც საცხოვრებელი ბინების განაწილებამდე საჭიროა შენობების ადეკვატური დაცვით უზრუნველყოფა, ვინაიდან არსებობს საშიშროება შენობების გარეშე პირების მიერ უკანონოდ/უნებართვოდ დაკავებისა“ – აცხადებენ აჭარის ფინანსთა და ეკონომიკის სამინისტროში.

დაცვის სამსახურმა „მიმდინარე წლის 31 დეკემბრამდე, 24 საათის განმავლობაში უნდა დაიცვას ობიექტები და მათში განთავსებული მატერიალურ-ტექნიკური ბაზა/ ქონება ქურდობის, ყაჩაღობის, განზრახ განადგურებისაგან ან სხვა კანონსაწინააღმდეგო ქმედებისაგან. აგრეთვე „დაცვა“ პასუხისმგებელია საზოგადოებრივი წესრიგის დაცვაზე, არ უნდა დაუშვას დასაცავ ობიექტებზე უცხო პირების შესვლა“.

აღნიშნული სახლების მშენებლობას აჭარის ავტონომიური რესპუბლიკის ფინანსთა და ეკონომიკის სამინისტრო „სოციალური და სტიქიის შედეგად დაზარალებული ოჯახების საცხოვრებელი პირობებით უზრუნველყოფის პროგრამის“ ფარგლებში ახორციელებდა.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com