არასამთავრობო ორგანიზაცია „პარტნიორობა ადამიანის უფლებებისთვის“ ინფორმაციით, დღეს 17 მარტს, თბილისის საქალაქო სასამართლოში დაკმაყოფილდა არასრულწლოვანის სარჩელი დამოუკიდებელი სკოლა „მოძღვარის“ წინააღმდეგ.
საქმე ეხება შეზღუდული შესაძლებლობის მქონე ბავშვის მიმართ დისკრიმინაციის ფაქტის დადგენასა და მორალური ზიანის ანაზღაურებას.
ორგანიზაციის ინფორმაციით, სასამართლომ დააკმაყოფილა ორივე მოთხოვნა და დაადგინა, რომ ადგილი ჰქონდა აუტისტური სპექტრის მქონე ბავშვის მიმართ დისკრიმინაციულ ქმედებებს – „ასევე, სასამართლომ სკოლას დააკისრა მორალური ზიანის ანაზღაურება 10,000 ლარის ოდენობით“.
როგორც ორგანიზაციის ხელმძღვანელი თამარ გაბოძე „ბათუმელებს“ ეუბნება, შემთხვევა 2023 წლის დეკემბერში მოხდა.
„საახალწლო ზეიმის ბოლოს ბავშვის დედას გადასცეს საბუთები და უთხრეს, რომ ბავშვი იყო სკოლიდან გათავისუფლებული. გააგდეს ბავშვი სკოლიდან. ეს იყო „პრესქული“, ანუ სკოლის მოსამზადებელი ეტაპი. ბავშვს აქვს აუტისტური სპექტრი და სჭირდება პერსონალური ასისტენტის დახმარება. დედა სთავაზობდა, რომ თვითონ უზრუნველყოფდა პერსონალურ ასისტენტს, მატერიალურად არანაირი ტვირთი არ იქნებოდა ბაღზე, უბრალოდ მიეცათ შესაძლებლობა, რომ ასისტენტს ემუშავა ბავშვთან.
თუმცა, ჩათვალეს, რომ ეს იქნებოდა უცხო ადამიანი და უცხო პირი არ გვჭირდება ბაღშიო. არც თავად შესთავაზეს ასისტენტის სერვისი და არც დედას მისცეს ამის საშუალება, რაც სრულდებოდა დედის ტირილით და დისკრედიტაციით.
ჩვენ მიგვმართა დედამ, რომელიც იყო ძალიან უიმედო და სასოწარკვეთილი, მივმართეთ სასამართლოს. ვითხოვდით დისკრიმინაციის ფაქტის დადგენას და მორალური ზიანის ანაზღაურებას. დავა გაგრძელდა ორი წელი და დღეს სასამართლომ მიიღო ბავშვის სასარგებლოდ გადაწყვეტილება“ – ამბობს თამარ გაბოძე.
ადვოკატის თქმით, ახლა ბავშვი სხვა სკოლაშია, სადაც სარგებლობს პერსონალური ასისტენტის სერვისით.
PHR-ის ინფორმაციით, საქმეზე მუშაობდნენ ადვოკატები: სოფიკო მენაბდიშვილი, თამარ გაბოძე.
მოსამართლე იყო ლიანა კაჟაშვილი.
