„ეს იქნება მეტი ბერკეტი მოსამართლეების გაკონტროლებისთვის“, – მიიჩნევს იურისტი, უფლებადამცველი გურო იმნაძე „ქართული ოცნების“ კანონპროექტზე, რომელიც იუსტიციის უმაღლეს საბჭოსთვის უფლებამოსილების გაზრდას ითვალისწინებს: მოსამართლის პედაგოგიურ საქმიანობაზე თანხმობას იუსტიციის უმაღლესი საბჭო გასცემს.
„იუსტიციის უმაღლესი საბჭო ისედაც დაუბალანსებლად ჭარბი ძალაუფლების მქონე ინსტიტუტია და მისი კომპეტენცია კიდევ უფრო იზრდება. ცხადია, ეს საფრთხის შემცველია, მით უმეტეს დღევანდელი კონტექსტის გათვალისწინებით: უმაღლესი საბჭო დახურული და ჩაკეტილი ორგანოა, საბჭოს მიერ მიღებული გადაწყვეტილებები კი, დასაბუთების სტანდარტს ვერ აკმაყოფილებს, მათში ხშირად ლოგიკის ამოკითხვა რთულია – ერთადერთი ლოგიკა, რომლითაც იღებენ იუსტიციის საბჭოში გადაწყვეტილებებს, ეს არის მოსამართლეების კონტროლის გაძლიერება და ძალის დემონსტრირება.
ეს შექმნის პრობლემას აკადემიური თავისუფლების კუთხითაც – აქამდე ფორმალურად იყო თავისუფალი მოსამართლე, რომ შეუზღუდავად განეხორციელებინა აკადემიური საქმიანობა. ეს არის დამატებითი ბერკეტი მოსამართლეების კონტროლისთვის,“ – გვითხრა გურო იმნაძემ.
„ბათუმელები“ ამ საკითხზე რამდენიმე მოქმედ მოსამართლეს დაუკავშირდა, ვინც ამავდროულად სხვადასხვა უმაღლეს სასწავლებელში სამართალში ლექციებს კითხულობს. მოსამართლეების ნაწილმა გვითხრა, რომ კანონპროექტს სათანადოდ არ იცნობენ, ნაწილმა კი კომენტარზე გვითხრა უარი, თუმცა აღნიშნა, რომ ახალი კანონპროექტის ჩანაწერი ბუნდოვანია, რადგან მოსამართლის პედაგოგიური საქმიანობის უფლება კონსტიტუციით გარანტირებული უფლებაა, იუსტიციის უმაღლესი საბჭოს „უფლებამოსილება“ კი, მოსამართლისთვის ვალდებულება ვერ გახდება.
მოსამართლემ, რომელმაც ახალი კანონპროექტის ბუნდოვანებაზე გაამახვილა ყურადღება, თქვა ისიც, რომ „ოცნების“ განმარტებითი ბარათი ააშკარავებს, რაც არის მიზანი: მოსამართლეების ტოტალური კონტროლი, მათ შორის, აუდიტორიებში!
„პირიქით, ყველაზე სახიფათო ინტერპრეტაციებს უნდა ველოდეთ… ნორმალურ პირობებში შეიძლება მხოლოდ იუსტიციის უმაღლესი საბჭოს ინფორმირებაზე ყოფილიყო საუბარი, მაგრამ ამ შემთხვევაში ცხადია, რომ პირდაპირ ნებართვის მიღებაზეა საუბარი.
ეს იქნება საბჭოსგან ნებართვის მიღების, დადასტურების საკითხი. სამართლებრივი ნორმების არასწორად ინტერპრეტირებას ხშირად ახდენს იუსტიციის უმაღლესი საბჭო. ეს უწყება მის ხელთ არსებულ უფლებამოსილებას იყენებს სელექციურად არა მართლმსაჯულების და საზოგადოების ინტერესების სასარგებლოდ, არამედ ვიწრო ძალაუფლების ინტერესისთვის.
ეს მომავალ პროფესიაზეც მოახდენს გავლენას, სამართლის სტუდენტებზე, რომლებსაც ხარისხიან განათლებაზე აღარ მიუწვდებათ ხელი, თუმცა პირველადი მიზანი მოსამართლეების უკეთესად გაკონტროლებაა,“ – უთხრა გურო იმნაძემ „ბათუმელებს“.
