გარემოს ეროვნული სააგენტოს ცნობით, დასავლეთ საქართველოში 27 თებერვლამდე შენარჩუნებული იქნება რთული მეტეოროლოგიური პირობები: ნალექი, უმეტესად თოვლის სახით, ზოგან ძლიერი.
ასევე, მოსალოდნელია ნისლი, ქარბუქი, გზებზე ლიპყინული, ელექტროგადამცემ ხაზებზე – შემოყინულობა, გორაკ-ბორცვიან ზონებში შესაძლებელია მეწყრული პროცესების განვითარება. ქვეყნის მაღალმთიან რაიონებში ნარჩუნდება ზვავსაშიშროება.
„დიდთოვლობის, ხილვადობის გაუარესების, ქარბუქის, ლიპყინულისა და ზვავსაშიშროების გამო საავტომობილო გზების ცალკეულ მონაკვეთებზე შესაძლებელია შეიზღუდოს ტრანსპორტის მოძრაობა – საფრთხის დონე მაღალი“ – იუწყება სააგენტო.
რაც შეეხება ამინდის პროგნოზს ბათუმში, აჭარის ჰიდრომეტეოროლოგიური ობსერვატორიის ცნობით, 25 თებერვლის 21 საათიდან 26 თებერვლის 21 საათამდე აჭარაში
მოსალოდნელია ღრუბლიანი ამინდი, დროგამოშვებით ნალექი, უმეტესად თოვლის სახით.
აჭარის მთიან სოფლებში კვლავ თოვაა მოსალოდნელი, ზოგან – ძლიერი.
იქროლებს დასავლეთის მიმართულების ქარი 10-15 მეტრი წამში.
სინოპტიკოსების ცნობით, 27 თებერვალს მოსალოდნელია დროგამოშვებით ნალექი, 28 თებერვალს კი გამოიდარებს.
