დღეს, 24 თებერვალს, დილის მონაცემებით, ბათუმში 1000-ზე მეტ აბონენტს ელექტროენერგია არ მიეწოდება.
როგორც „ენერგო პრო-ჯორჯიაში“ ბათუმელებს უთხრეს, ელექტროენერგიის შეწყვეტა გამოწვეულია დიდთოვლობით.
„ამ დროისთვის ელექტროენერგია არ მიეწოდება ხელვაჩაურში 300-მდე აბონენტს, ბათუმში, შუა მახინჯაურში, 150-მდე აბონენტს და ასევე, ანგისის მხარეს იყო გათიშული 600-მდე აბონენტი და ალბათ, დღის ბოლომდე ჩავრთავთ მათაც.
ჩვენ გადამცემ ხაზებს ძირითადად თოვლისგან მოტეხილი ხეები გვიზიანებს, რადგან ელექტროგადამცემ ბოძებს ეცემა და შემდეგ საჭიროა დაზიანებული ქსელების აღდგენა“- გვითხრეს კომპანიაში.
ბათუმში მესამე დღეა ინტენსიურად თოვს. ამ დროისთვის თოვლის საფარი ნახევარ მეტრს აჭარბებს. როგორც აჭარის რეგიონული ჰიდრომეტეოროლოგიურ ობსერვატორიაში გვეუბნებიან, თოვა შენარჩუნდება დღის განმავლობაში და შესაძლოა გაგრძელდეს 25 თებერვალსაც.
