„არ იქნება სამართალი, არ იქნება მშვიდობა“, „რუსებს მოქალაქეობა, ლაზი მედროშე ისტორიული სამშობლოს გარეშე“, „რუსეთი მტერია, მზია მსხვერპლია, ხვალ შენი ჯერია“ , „თავისუფლება რეჟიმის ტყვეებს“, „მგონია, რომ აბსურდის თეატრში ვართ“, – ამ შინაარსის საპროტესტო პლაკატებით გამოვიდა 21 თებერვალს სენაკის ქუჩებშირამდენიმე აქტივისტი.
თითოეული მათგანი სხვადასხვა შინაარსის მქონე პლაკატით დადგა ქუჩაში, სენაკის პროკურატურასთან, ქალაქის მთავარ მოედანზე, ბაზართან და ასე შეეცადა მიექცია საზოგადოების ყურადღება.
სენაკელი აქტივისტი ალისა ცაავა “ბათუმელებთან” ამბობს, რომ ქუჩაში საპროტესტო პლაკატებით იდგა რამდენიმე აქტივისტი, მაგრამ მათი ხმა მისწვდა ბევრ ადამიანს.
„ხალხის დიდი მხარდაჭერა ვიგრძენით. გამვლელები გვეხუტებოდნენ, ერთმა კაცმა ქუდი მოიხადა და მე დამაფარა, არ გაცივდეო. ჩემ მეგობარს ხელთათმანები გამოუტანეს. თუმცა მაინც რთულია პატარა ქალაქში აქტივიზმი. ყველა ერთმანეთს ვიცნობთ, შემდეგ ოჯახის წევრებზე ახდენენ ზეწოლას. მაგრამ გააზრებული გვაქვს ის, რომ ბრძოლა არის ქვეყნის გადასარჩენად,“ – ამბობს „ბათუმელებთან“ აქციის ერთ-ერთი მონაწილე, ალისა ცაავა.
86 დღეა საქართველოში პროევროპული საპროტესტო აქციები იმართება.
