ბათუმის შოთა რუსთაველის სახელმწიფო უნივერსიტეტის რექტორობის კანდიდატი არჩილ გუჩმანიძე „ბათუმელების“ პირდაპირ ჩართვაში მის მიმართ განხორციელებულ მუქარაზე საუბრობს.
რექტორობის კანდიდატი ამბობს, რომ მას „ოცნების“ მაღალჩინოსნები ემუქრებიან და სთხოვენ, რომ კონკურსში მონაწილეობა არ მიიღოს. წინააღმდეგ შემთხვევაში, მას და მისი ოჯახის წევრებს საფრთხე დაემუქრება.
„ცოტა შოკირებული ვარ, რადგან ვერ წარმომედგინა, თუ რექტორობის კანდიდატობა მათთვის ამხელა პრობლემა იქნებოდა.
განაცხადის შეტანიდან ორ დღეში და პოსტის გამოქვეყნებიდან რამდენიმე საათში მოვიდნენ ჩემთან „კეთილისმყოფელები“, რომლებმაც პირდაპირ მითხრეს, რომ უნდა გამოვიტანო კანდიდატის დოკუმენტაცია რექტორის არჩევნებიდან. ან ყველაზე კარგ შემთხვევაში, თუ არ გამოვიტან, უნდა წავშალო ყველა პოსტი, არანაირი აქტივობა არ უნდა იყოს ჩემი მხრიდან, უნდა მივიდე იქ ჩუმად, ისე, რომ არაფერი ვთქვა და ჩუმად უნდა გამოვიდე იქიდან, ისე, რომ არც ტელევიზიები არ უნდა მივიყვანო, არც არასამთავრობოები, არც გულშემატკივრები, არც აკადემიური წრის წარმომადგენლები.
და თუ მე ამას არ გავაკეთებ, მექნება პრობლემა მე პირადად, ჩემს ოჯახს. საუბარი იყო მათ შორის შვილებზეც. მყავს 6 თვის ბავშვი და 13 წლის გოგონა. 6 თვის ბავშვით მემუქრებიან. ასევე, საუბარი იყო ჩემს ოჯახზე, ძმისშვილებზე, ძმებზე, რომ თუ მე ამას არ გავაკეთებ, იქნება პრობლემები.
რა თქმა უნდა, მე ამას არ გავაკეთებ. არანაირი საბუთის გამოტანა არ იქნება, იქნება ბრძოლა ბოლომდე“ – ამბობს „ბათუმელებთან“ არჩილ გუჩმანიძე.
ის ამბობს, რომ დღეს, 17 იანვარს, გამოაქვეყნებს პოსტს, სადაც საზოგადოებას მიაწვდის ინფორმაციას, თუ რის გაკეთებას აპირებს მომავალში.
მისი თქმით, მუქარის გადასაცემად მასთან ერთი ადამიანი იყო მისული, რამდენიმე კი ამ პროცესს იღებდა.
შეგიძლიათ დაასახელოთ იმ პირის ვინაობა, ვინც მუქარის შეტყობინება გადმოგცათ? – ჰკითხა „ბათუმელებმა“ არჩილ გუჩმანიძეს. მისი თქმით, დასახელებას აზრი არ აქვს, რადგან ამ პირის უსაფრთხოებასაც უფრთხილდება.
„მოგეხსენებათ, ჩემს ოჯახს ორი დღე აწიოკებდნენ, მაგრამ არავის არაფერი გამოუძიებია. უამრავი განუკითხაობის და უსამართლობის მომსწრე ვარ და ვერანაირ აზრს ვერ ვხედავ, რომ მივმართო სამართალდამცავ უწყებებს. ერთადერთი, მივმართავ სახალხო დამცველის აჭარის წარმომადგენლობას და ჩემს განცხადებას დავაფიქსირებ.
იმ ადამიანთან, ვინც მომიგზავნეს, მაქვს დიდი ხნის ურთიერთობა, ფაქტობრივად, ის იყო შუამავალი, ეს არ იყო მისი პირადი აზრი, იყო მითითება იმაზე, რომ მე ახალგაზრდა ადამიანი ვარ და ცხოვრება წინ მაქვს, მყავს შვილები“ – ამბობს არჩილ გუჩმანიძე.
რა შეიძლება იყოს საფრთხე და ვინ ელაპარაკა შუამავალ პირს ამის შესახებ? – ისევ ჩავეკითხეთ მას. გუჩმანიძის თქმით, ამ საუბარში „ქართული ოცნების“ მაღალჩინოსნები მონაწილეობდნენ.
ბათუმის რუსთაველის სახელმწიფო უნივერსიტეტის რექტორობის კონკურსში „ქართული ოცნების“ წევრი და აჭარის არალეგიტიმური უმაღლესი საბჭოს წევრი ტიტე აროშიძეც მონაწილეობს. ამიტომ არჩილ გუჩმანიძეს ვკითხეთ, მოდის თუ არა მუქარა, მაგალითად, ტიტე აროშიძისგან ან მასთან დაახლოებული პირებისგან?
არჩილ გუჩმანიმემ ამ კითხვას ასე უპასუხა:
„შეიძლება არიან, შეიძლება არ არიან. მაგრამ ფაქტია ის, რომ ეს არის ერთი ჯგუფი, ეს არის ერთი ხელწერა, ეს არის ერთი გუნდი. კონკრეტულად მან გამოუშვა ეს ადამიანი ჩემთან თუ სხვამ გამოუშვა, ამას ვერ გეტყვით, მაგრამ არის შემოთვლა“.
ბათუმის რუსთაველის სახელმწიფო უნივერსიტეტში რექტორობის ორი კანდიდატი მონაწილეობს მხოლოდ, არჩილ გუჩმანიძე და ტიტე აროშიძე.
რექტორი აკადემიურმა საბჭომ 21 იანვარს, ოთხი წლის ვადით უნდა აირჩიოს.
