ოთხი ოპოზიციური პარტია ეუთო/ოდირს მიმართავს და საქართველოში სპეციალური მისიის გამოგზავნას სთხოვს. როგორც დღეს, 19 დეკემბერს, გაერთიანებულ საინფორმაციო ცენტრში გამართულ ბრიფინგზე გახდა ცნობილი, ეუთო/ოდირისათვის გასაგზავნ წერილზე ოთხივე ოპოზიციურმა პარტიამ ერთად იმუშავა.
„დავასრულეთ ერთობლივი წერილი, რომელიც გაეგზავნება ეუთო/ოდირს.
ამ წერილში ჩვენ ვთხოვთ ეუთო/ოდირს, რომ აამუშაოს „მოსკოვის მექანიზმი“, რომელიც პირველად გამოყენებული იქნა 1991 წელს, რაც გულისხმობს იმას, რომ ეუთო/ოდირმა უნდა გამოაგზავნოს საქართველოში სპეციალური მისია, რომელიც შეისწავლის კანონდარღვევებს და მიტაცებულ არჩევნებს.
რომ სამომავლოდ ჩვენ გვქონდეს თავისუფალი და სამართლიანი არჩევნების ჩატარების [შესაძლებლობა] ამ ქვეყანაში,“ – განაცხადა ოთხი ოპოზიციური პარტიის ბრიფინგზე „კოალიცია ცვლილებისთვის“ წევრმა გიორგი ბუტიკაშვილმა.
მისივე თქმით, ამავე მისიამ აუცილებლად უნდა შეისწავლოს „ქართული ოცნების“ მიერ საკუთარი მოქალაქეების წინააღმდეგ გამოცხადებული ტერორი.
„[მისიამ უნდა] შეისწავლოს ასევე ის ძალადობრივი ფაქტები, რომელსაც რუსული რეჟიმი საკუთარი მოსახლეობის წინააღმდეგ ახორციელებს. წერილს თან ახლავს საიას რეპორტი, სადაც წვრილად არის ახსნილი ის ძალადობა, ის ტერორიზმი, რომელიც ივანიშვილმა მოუწყო საკუთარ მოსახლეობას, თუ როგორ გამოუცხადა ომი ივანიშვილმა ქართველ ხალხს, ვინაიდან მას სძულს ქართველები, ისევე როგორც სძულდა სტალინს. ამ წერილში ფაქტობრივი მასალაა, რომელიც სულ მალე იქნება ეუთო/ოდირის მეილებზე გაგზავნილი,“ – თქვა გიორგი ბუტიკაშვილმა.
მისივე თქმით, ევროპული კოალიცია აგრძელებს ერთობლივ მუშაობას იმისათვის, რომ საქართველო დაუბრუნდეს ევროპულ გზას.
___
- რა ხდება
საქართველოში მიმდინარეობს მასშტაბური პროტესტი, რომელმაც არა მარტო თბილისი, არამედ საქართველოს სხვა ქალაქებიც მოიცვა.
პროტესტი გამწვავდა 28 ნოემბერს ირაკლი კობახიძის განცხადების შემდეგ, რომ „ქართული ოცნება“ ევროკავშირში გაწევრიანების პროცესს 2028 წლის ბოლომდე აჩერებს.
28 ნოემბრიდან დღემდე ათასობით ადამიანი გამოდის საპროტესტო აქციებზე თბილისში, ბათუმსა და საქართველოს სხვა ქალაქებში.
დაკავებულია და სასტიკად ნაცემი ასობით ადამიანი, მათ შორის, მედიის წარმომადგენლები, სახელოვნებო სივრცის წარმომადგენლები. არაიდენტიფიცირებადი პირები ჯგუფურად თავს ესხმიან ქუჩებში მოქალაქეებსა და მედიის წარმომადგენლებს.
სახალხო დამცველის 19 დეკემბრის მონაცემებით, 28 ნოემბრიდან 16 დეკემბრის ჩათვლით სახალხო დამცველის წარმომადგენლებმა დროებითი მოთავსების იზოლატორებსა და კლინიკებში მოინახულეს 362 პირი. მათგან არასათანადო მოპყრობაზე მიუთითებდა 227 პირი, ხილული დაზიანებები აღენიშნებოდა 158 პირს.
