„მოვუწოდებთ საერთაშორისო თანამეგობრობას, მიიღოს გადამწყვეტი ზომები მშვიდობიანი დემონსტრანტების, განსაკუთრებით, ბავშვების, ახალგაზრდების, ქალების, შეზღუდული შესაძლებლობის მქონე პირებისა და ჟურნალისტების წინააღმდეგ გამოყენებული ძალადობრივი, რეპრესიული ზომების საპასუხოდ“ – „კოალიცია ბავშვებისა და ახალგაზრდებისთვის“ საერთაშორისო თანამეგობრობას რეაგირებისკენ მოუწოდებს.
კოალიცია აქვეყნებს განცხადებას, რომლითაც გმობს ადამიანის უფლებების დარღვევის საგანგაშო ფაქტებს, რომლებსაც ადგილი აქვს საქართველოში მშვიდობიანი საპროტესტო აქციების მონაწილეების მიმართ.
კოალიციის შეფასებით, საქართველოს სამართალდამცავების მიერ გამოყენებული სასტიკი ტაქტიკა წარმოადგენს ადამიანის უფლებების უხეში უგულებელყოფის მაგალითს და არღვევს საერთაშორისოდ აღიარებულ სტანდარტებს, მათ შორის, გაეროს ბავშვის უფლებათა კონვენციას [UNCRC].
„შემაძრწუნებელია, რომ თავისუფალი გამოხატვისა და მშვიდობიანი შეკრების უფლების გამოყენების გამო ბავშვები, ახალგაზრდები და ზრდასრულები ექვემდებარებიან ამგვარი ტიპის ძალადობას, წამებას, დამამცირებელ და არაადამიანურ მოპყრობას. ხაზი უნდა გაესვას, რომ ამ უფლებით სარგებლობენ როგორც ზრდასრული ადამიანები, ასევე ბავშვები.
ბავშვის უფლებათა კონვენციაზე ხელმოწერით, საქართველო აღიარებს ბავშვთა გამოხატვის თავისუფლების უფლებას [მუხლი 13], გაერთიანების თავისუფლებისა და მშვიდობიანი შეკრებისთავისუფლების უფლებას [მუხლი 15]. ასევე, საქართველოს ბავშვის უფლებათა კოდექსის შესაბამისად, თითოეულ ბავშვს აქვს გაერთიანებისა და მშვიდობიანი შეკრების თავისუფლების უფლება [მუხლი 17].
არასრულწლოვანთა შემაძრწუნებელი ჩვენებები, [16 წლის დ.გ., რომელმაც სპეცრაზმის ხელით მძიმე დაზიანებები მიიღო და 17 წლის ლ.კ., რომელსაც ფიზიკური დაზიანება მიაყენეს და უკანონოდ დააკავეს), ხაზს უსვამს ადამიანის უფლებების მძიმე დარღვევებზე. ეს ინციდენტები ცხადყოფს საზოგადოების ყველაზე დაუცველი წევრების უფლებების დარღვევას და ეწინააღმდეგება გაეროს ბავშვის უფლებათა კონვენციის ჩანაწერს, რომელიც სახელმწიფოს ავალდებულებს დაიცვას ბავშვები ყველა ფორმის ძალადობისგან“ – ვკითხულობთ განცხადებაში.
კოალიცია საერთაშორისო თანამეგობრობას რეაგირებას სთხოვს:
„ვთხოვთ მთავრობებს, დიპლომატიურ მისიებს, უფლებადამცველ ორგანიზაციებსა და სამოქალაქო საზოგადოებას – გადამწყვეტი რეაგირება მოახდინოს არსებულ კრიზისზე.
სამართალდამცველებად წოდებულ პირთა სისასტიკე დაუსჯელად რჩება და მშვიდობიანი მომიტინგეები, მათ შორის, ბავშვები, ახალგაზრდები, ქალები, ჟურნალისტები და შეზღუდული შესაძლებლობის მქონე პირები ძალადობის სამიზნე ხდებიან.
ჩვენ სოლიდარული უნდა ვიყოთ მათთან, ვინც დღეს, ქვეყნის სხვადასხვა ქალაქში იბრძვის მოქალაქეთა ფუნდამენტური უფლებების დაცვისთვის. ვითხოვთ იმ პირთა პასუხისმგებლობის საკითხის დაყენებას, ვინც ძალადობს მოქალაქეებზე, ასევე, ყველა იმ ქმედების დაუყოვნებლივ შეწყვეტას, რომელიც ლახავს ადამიანის ღირსებას და უფლებებს.
მოვუწოდებთ საერთაშორისო საზოგადოებას – გაეროს ადამიანის უფლებათა საბჭოს, ევროკავშირს და სხვა საერთაშორისო ორგანოებს, განახორციელონ შემდეგი ქმედებები:
- ხელი შეუწყონ ადამიანის უფლებების დარღვევის შემთხვევების გამოძიებას, მხარი დაუჭირონ საფუძვლიანი და დამოუკიდებელი გამოძიების წარმართვას სამართალდამცავი ორგანოების მიერ ძალის გადაჭარბებული გამოყენებისა და მომიტინგეების, განსაკუთრებით, არასრულწლოვანთა/ ახალგაზრდების მიმართ გავრცელებული ძალადობის ნაწილში.
- მხარი დაუჭირონ ადგილობრივ უფლებადამცველ ორგანიზაციებს და აქტივისტებს, რომლებიც დაუღალავად მუშაობენ ძალადობის ფაქტების დოკუმენტირებისთვის და მსხვერპლთა მხარდასაჭერად, უზრუნველყონ მათი ხმის მოსმენა და მოძალადეთა წინააღმდეგ მკაცრი ზომების მიღება.
- განიხილონ სანქციების დაწესება იმ პირების წინააღმდეგ, რომლებიც ხელს უწყობენ და პასუხისმგებელნი არიან საქართველოში ადამიანის უფლებების მძიმე დარღვევებზე.
- დიპლომატიური არხების გამოყენებით განახორციელეთ ზეწოლა საქართველოს ხელისუფლებაზე, რათა უზრუნველყოს საერთაშორისო ვალდებულებების შესრულება.
ახლაა გადამწყვეტი მოქმედების დრო. კოალიცია ბავშვებისა და ახალგაზრდებისთვის მიმართავს საერთაშორისო საზოგადოებას ჩაერიოს და აღუდგეს ძალადობისა და ადამიანის უფლებების დარღვევის მზარდ ტალღას საქართველოში. ბავშვების უფლებებისა და კეთილდღეობის დაცვა საერთო პასუხისმგებლობაა“ – ვკითხულობთ განცხადებაში.
_______________________
ფოტოზე: საპროტესტო აქცია თბილისში, 2024 წლის 3 დეკემბერი. ფოტო: ევროპის პრესფოტო სააგენტო EPA-EFE/DAVID MDZINARISHVILI
