ესტონეთში მცხოვრები საქართველოს მოქალაქეები ელჩს, ზურაბ ხამაშურიძეს ისევ ეძებენ.
„დაკარგულია“- ამ შინაარსის პოსტერები დღეს, 10 დეკემბერს, ტალინის ქუჩებში გააკრეს მოქალაქეებმა, რომლებიც რამდენიმე დღეა ესტონეთში საქართველოს ელჩთან შეხვედრას ითხოვენ, თუმცა ელჩი არ ჩანს.
„საქართველოს ხელისუფლება სცემს, აპატიმრებს და სასტიკად არბევს პროდემოკრატიულ მომიტინგეებს. ამის მიუხედავად, საქართველოს ელჩმა დუმილი არჩია.
ჩვენ, ქართველებმა, არაერთხელ მივმართეთ ელჩს, ვითხოვეთ დიალოგი, ვეძებთ პასუხებს და ვითხოვთ პასუხისმგებლობას. მაგრამ პასუხების ნაცვლად ელჩი მიიმალა – თავი აარიდა შეხვედრებს, უგულებელყო ზარები და უარი თქვა შეხვედრაზე.
მოვუწოდებთ ელჩს შეასრულოს თავისი მოვალეობა: გამოხატოს პოზიცია, შეგვხვდეს და უპასუხოს ჩვენს კითხვებს.
დუმილი არ არის ნეიტრალიტეტი, ეს არის თანამონაწილეობა“ – წერენ საქართველოს მოქალაქეები, რომლებიც ამჟამად ესტონეთში, ტალინში ცხოვრობენ.
ესტონეთში მცხოვრები ემიგრანტები 5 დეკემბერსაც იმყოფებოდნენ საელჩოში, თუმცა დაცვამ მათ შენობაში გაჩერების უფლება არ მისცა.
„გამოგვაგდეს შენობიდან“ – ამბობდნენ მოქალაქეები „ბათუმელებთან“.
„დაიკარგა“ – ესტონეთში საქართველოს ელჩს, ემიგრანტები ისევ ეძებენ.
მას შემდეგ, რაც „ქართულმა ოცნებამ“ განაცხადა, რომ 2028 წლამდე შეაჩერა ევროკავშირთან მოლაპარაკებები გაწევრიანების თაობაზე, ელჩებისა და დიპლომატების ნაწილი გაემიჯნა ანტიკონსტიტუციურ ხელისუფლებას, ნაწილი კი, ისევე როგორც ესტონეთში მყოფი ზურაბ ხამაშურიძე, დუმილს ამჯობინებს.
საქართველოში მე-13 დღეა არ წყდება საპროტესტო გამოსვლები.
ანტიკონსტიტუციური ხელისუფლება სასტიკად უსწორდება დემონსტრანტებს – არბევს, თავს ესხმიან მშვიდობიან მოქალაქეებს, დაკავებული და დაშავებულია 400-მდე ადამიანი. რეპრესიები გრძელდება, თუმცა მოქალაქეები არ აპირებენ პროტესტის შეწყვეტას, მოითხოვენ არალეგიტიმური ხელისუფლების გადადგომას და ახალ არჩევნებს.
