დღეს, 3 დეკემბერს, ბათუმის მე-11 საჯარო სკოლის მე-10, მე-11 და მე-12-კლასელები გაიფიცნენ.
როგორც მოსწავლეები „ბათუმელებთან“ საუბარში ამბობენ, გაფიცული მოსწავლეები სკოლის ეზოში არიან და არ ესწრებიან საგაკვეთილო პროცესს.
ისინი საპროტესტო აქციაზე წასვლას აპირებენ, რომელიც ბათუმში, ევროპის მოედანზე 12:00 საათზე არის დაგეგმილი.
„აქ პოლიციის გამოძახებით გვემუქრებიან, მაგრამ ჩვენ ვიცით ჩვენი უფლებები“ – ამბობენ მოსწავლეები.
ბათუმში მე-11 საჯარო სკოლის მოსწავლეები გაიფიცნენ
საპროტესტო აქციები ქვეყნის მასშტაბით 28 ნოემბერს დაიწყო და დღემდე გრძელდება.
საქართველოს ათასობით მოქალაქე აპროტესტებს „ქართული ოცნების“ განცხადებას იმასთან დაკავშირებით, რომ შეაჩერეს ევროკავშირთან მოლაპარაკებების გახსნა.
პოლიცია, სპეცრაზმი საპროტესტო აქციის მონაწილეებს სასტიკად უსწორდება. თბილისში დემონსტრაციების დასაშლელად სხელისუფლება იყენებს ცრემლსადენ გაზს, წყლის ჭავლს. არიან მძიმედ დაშავებული და დაკავებული პირები.
კონსტიტუციონალისტების და არასამთავრობო ორგანიზაციების განცხადებით „ქართული ოცნების“ ხელისუფლება კონსტიტუციის ფარგლებიდან არის გასული და არღვევს საქართველოს მოქალაქეების უფლებებს.
