აშშ-ს მთავრობის გაცვლითი პროგრამების საქართველოს მონაწილეთა ასოციაცია მიიჩნევს, რომ 2028 წლის ბოლომდე ევროკავშირთან წევრობის თაობაზე მოლაპარაკებების დაწყების საკითხის პოლიტიკური დღის წესრიგიდან ამოღება, არღვევს საქართველოს კონსტიტუციის 78-ე მუხლს.
„აღნიშნული მუხლის თანახმად, ყველა სახელმწიფო ორგანოს აკისრია მკაფიო ვალდებულება – უზრუნველყოს საქართველოს სრული ინტეგრაცია ევროპის კავშირსა და ჩრდილოატლანტიკური ხელშეკრულების ორგანიზაციაში.
სამწუხაროდ, საქართველოს მთავრობის მიერ მიღებული გადაწყვეტილება ხელყოფს როგორც კონსტიტუციურ ნორმას, ასევე უგულებელყოფს საქართველოს მოქალაქეთა აბსოლუტური უმრავლესობის ნებასა და ქვეყნის მრავალსაუკუნოვან ისტორიულ არჩევანს.
მიგვაჩნია, რომ ევროინტეგრაციის შეჩერების შესახებ მიღებული ანტიკონსტიტუციური გადაწყვეტილება საქართველოს მოქალაქეებს ართმევს იმ ევროპულ მომავალს, რომლისათვისაც წლებია ვიბრძვით.
მეტიც, ის ჩვენი ისტორიული და ცივილიზაციური არჩევანია. შესაბამისად, ქვეყნისათვის სასიცოცხლოდ მნიშვნელოვანი პროცესის შეფერხებით ვკარგავთ იმ სტრატეგიული მიზნებისა და ამოცანების მიღწევის შესაძლებლობას, რაც დაკავშირებულია სახელმწიფოს განვითარებასთან, პროგრესთან, კეთილდღეობასა და უსაფრთხოებასთან.
ამასთან, ვგმობთ მშვიდობიანი მოქალაქეების წინააღმდეგ ძალისმიერი, არაპროპორციული მეთოდების გამოყენებას, რომლებიც უხეშად ხელყოფენ ადამიანის ფუნდამენტურ უფლებებსა და თავისუფლებებს.
ჩვენი, როგორც საქართველოს მოქალაქეების საერთო რესურსი სწორედ ევროპული ოჯახის წევრობისკენაა მიმართული, იმ ეროვნული მიზნისკენ, რომელიც საქართველოს კონსტიტუციითა განმტკიცებული და საქართველოს მოსახლეობის დიდი უმრავლესობის მიერაა მხარდაჭერილი“ – ნათქვამია განცხადებაში, რომელიც დღეს, პირველ დეკემბერს გავრცელდა, რომელსაც ხელს აწერს 204 ადამიანი.
ქვეყანაში მასობრივი საპროტესტო გამოსვლები 28 ნოემბრის შემდეგ უწყვეტად მიმდინარეობს.
პოლიცია-სპეცრაზმი სასტიკად უსწორდება აქციის მონაწილეებს. ამ დროისთვის დაკავებული და დაშავებულია ასზე მეტი ადამიანი.
