ხელვაჩაურის საოლქო კომისიის მეხუთე საუბნო კომისიამ გადასატანი ყუთის სია წესის დარღვევით შეადგინა – კერძოდ, სიას თან არ ერთვის ამომრჩეველთა რიგის ნომრები – წერს ცენტრალურ საარჩევნო კომისიას ენმ-ის წარმომადგენელი, გიგა თედორაძე. მან საჩივარს თან დაურთო ფოტომასალა, სადაც ასახულია, თუ როგორ არის შედგენილი გადასატანი ყუთის სია. ამ ფოტომასალის მიხედვით, სიაში მხოლოდ სახელები/გვარები და დაბადების თარიღებია მითითებული.
ამომრჩეველთა რიგის ნომრების შესახებ ინფორმაცია არ არის. სიაში 99 პირია.
სქრინი საჩივარზე თანდართული სიებიდან
მომჩივანი ცესკოს წერს, რომ კანონით „გადასატანი ყუთის სიაში შევა იგივე მონაცემები, რაც არის ამომრჩევლის ერთიან სიაში, გარდა მისი ფოტოსურათისა და დამატებით აღინიშნება ამომრჩევლის რიგითი ნომერი ამომრჩევლის ერთიან ან სპეციალურ სიაში“.
მომჩივანი მიუთითებს, რომ ირღვევა საარჩევნო კოდექსის 33-ე მუხლი და რეაგირებას ითხოვს.
საარჩევნო კოდექსის 33-ე მუხლის ჩანაწერი საჩივარში მითითებული განმარტების იდენტურია: „გადასატანი საარჩევნო ყუთის სიაში შეიტანება ამომრჩევლის შესახებ იგივე მონაცემები, რომლებიც არის ამომრჩეველთა ერთიან სიაში, გარდა მისი ფოტოსურათისა და დამატებით აღინიშნება ამ ამომრჩევლის რიგითი ნომერი ამომრჩეველთა ერთიან ან სპეციალურ სიაში.“
სიებში კი, რომლებიც მომჩივანმა ცესკოს წარუდგინა, ამომრჩეველთა რიგის ნომრები მითითებული არ არის. შესაბამისად, სადამკვირვებლო ორგანიზაციებისთვის ამ სიებში მოცემული ინფორმაციის ნამდვილობის გადამოწმება მარტივი არ იქნება.
ცესკოს ამ საჩივრის განხილვა ჯერ არ დაუსრულებია.
- რესურსის გამოყენება
ხელვაჩაურის [83] საოლქო კომისიის წინააღმდეგ საჩივრით ცესკოს „საერთაშორისო გამჭვირვალობა – საქართველომაც“ მიმართა. ორგანიზაცია საბიუჯეტო სახსრებით დაფინანსებული ღონისძიების „ოცნების“ კანდიდატების სასარგებლოდ გამოყენებაზე წერს. კერძოდ, საუბარია „ხელვაჩაურის დღეებზე“, რომელიც 2024 წლის 29 სექტემბერს გონიოს ციხეში ჩაატარეს.
ღონისძიებას რეგიონის თანამდებობის პირებთან ერთად „ოცნების“ კანდიდატი პარლამენტში [22 ნომერი სიაში], არჩილ ბერიძეც ესწრებოდა. ორგანიზაციის შეფასებით, „ბათუმის მერიის მიერ გამოქვეყნებული ფოტომასალიდან იკვეთება, რომ მმართველი პარტიის კანდიდატი ღონისძიებაში ორგანიზატორების მიერ იყო ჩართული“.
სადამკვირვებლო ორგანიზაციაში მიიჩნევენ, რომ „ოცნების“ კანდიდატის, არჩილ ბერიძის ღონისძიებაში მონაწილეობით დაირღვა საარჩევნო კოდექსის 45.7 მუხლი, რომლის მიხედვითაც აკრძალულია სახელმწიფო ბიუჯეტის ან მუნიციპალიტეტის ბიუჯეტის დაფინანსებით ორგანიზებულ ღონისძიებაზე ან პრეზენტაციაზე ორგანიზატორის მიერ წინასაარჩევნო აგიტაციის გაწევა. აღნიშნული ქმედება ჩაითვლება ადმინისტრაციული რესურსების გამოყენებად.
ფოტო ხელვაჩაურის მერიის ფეისბუქის გვერდიდან
ფოტო ხელვაჩაურის მერიის ვებგვერდიდან – „ხელვაჩაურის დღეები“. ფოტოზე მარცხნიდან ხელვაჩაურის მერი ზაზა დიასამიძე, უმაღლესი საბჭოს თავმჯდომარე დავით გაბაიძე – ის უმაღლესი საბჭოს „ოცნების“ სიაშია, შემდეგ – თენგიზ ირემაძე, ხელვაჩაურის საკრებულოს თავმჯდომარე, ბათუმის მერი არჩილ ჩიქოვანი, „ოცნების“ კანდიდატი არჩილ ბერიძე და უმაღლესი საბჭოს წევრობის კანდიდატი რამაზ ჯინჭარაძე.
ორგანიზაციის განმარტებით, იმისათვის, რომ 45.7 მუხლის დარღვევა დადგინდეს, სახეზე უნდა იყოს შემდეგი გარემოებები:
- სახელმწიფო ან ადგილობრივი ბიუჯეტით მოხდეს ღონისძიების ორგანიზება.
- ამ ღონისძიებაზე ადგილი ჰქონდეს წინასაარჩევნო აგიტაციას.
- ამ აგიტაციას ეწეოდეს ორგანიზატორი.
„ხელვაჩაურის დღეები“ დაფინანსებული იყო ხელვაჩაურის მერიის მიერ. რაც შეეხება იმას, ჰქონდა თუ არა ადგილი აგიტაციას ამ ღონისძიებაზე, ორგანიზაცია წერს:
ამონარიდი საჩივრიდან
„გამჭვირვალობა საქართველო“ ცესკოსთვის გაგზავნილ თავის საჩივარში განმარტავს, რომ ამ ყველაფერთან ერთად მნიშვნელოვანია განისაზღვროს, ეწეოდნენ თუ არა აგიტაციას ღონისძიების ორგანიზატორები.
ორგანიზაცია წერს: „გადაწყვეტილება, რომ წინასაარჩევნო პერიოდში საარჩევნო სუბიექტის კანდიდატს მიეღო მონაწილეობა ბიუჯეტით დაფინანსებულ ღონისძიებაში, იმთავითვე გულისხმობს ამ კანდიდატის სასარგებლო აგიტაციას, მათი ცნობადობის გაზრდას, მათ ასოცირებას მუნიციპალიტეტის ბიუჯეტით დაფინანსებული პროექტების განხორციელებასთან, რასთანაც კანდიდატს კავშირი არ აქვს“.
„გამჭვირვალობის“ საჩივარი
- აგიტაცია სამუშაო საათებში
კიდევ ერთი სადამკვირვებლო ორგანიზაცია „სამართლიანი არჩევნები“ შუახევის მუნიციპალიტეტში ადმინისტრაციული რესურსის გამოყენებას ასაჩივრებს. საჩივრის მიხედვით, 2024 წლის 1 და 4 ოქტომბერს შუახევის მერიის ჯანდაცვისა და სოციალური სამსახურის უფროსი, პაატა ქათამაძე სოციალური ქსელის გამოყენებით „ქართული ოცნების“ სასარგებლოდ ატარებდა აგიტაციას სამუშაო საათებში.
ორგანიზაციის მეორე საჩივრის მიხედვით კი, 4, 7 და 10 ოქტომბერს შუახევის მუნიციპალური სერვისების სააგენტოს დირექტორი სამუშაო საათებში ატარებდა „ოცნების“ სასარგებლოდ აგიტაციას ფეისბუქში.
„სამართლიანმა არჩევნებმა“ მსგავსი შინაარსის 3 საჩივრით ცესკოს ხულოს მერიის საჯარო მოხელეების მხრიდან დარღვევაზეც მიმართა. ერთ შემთხვევაში საუბარია ხულოს მერიის სოციალური დაცვის და სტიქიით დაზარალებულთა სამსახურის უფროსის, ჯამბულატ მელაძის მხრიდან სამუშაო საათებში „ოცნების“ სასარგებლო აგიტაციაში ჩართვაზე, მეორე შემთხვევაში კი ხულოს მერიის აპარატის უფროსის მხრიდან სოციალური ქსელის მეშვეობით აგიტაციაზე „ოცნების“ სასარგებლოდ.
საუბარი ეხება საბიუჯეტო სახსრებით დაფინანსებულ ღონისძიებაზე კანდიდატის მონაწილეობას. როგორც ორგანიზაცია წერს, ღონისძიებას „ოცნების“ კანდიდატები – ანზორ ბოლქვაძე და ვახტანგ ბერიძე ესწრებოდნენ. ანზორ ბოლქვაძე „ოცნების“ საპარლამენტო სიაშია, ხულოს ყოფილი მერი ვახტანგ ბერიძე კი – აჭარის უმაღლესი საბჭოს სიაში. „ოცნების“ უმაღლესი საბჭოს სიის პირველი ნომერია აჭარის მთავრობის თავმჯდომარე თონიკე რიჟვაძე, შესაბამისად, ისიც ოცნების კანდიდატია.
საჩივარში საუბარია „აჭარის პროექტების მართვის კომპანიის“ მიერ ხულოს მუნიციპალიტეტის სოფელ ღორჯომში სასპორტო სკოლის გახსნის ღონისძიებაზე.
ორგანიზაცია საჩივარში მიუთითებს იმასაც, რომ სკოლის გახსნის აღმნიშვნელი ფოტომასალა ხულოს მერიამ და აჭარის პროექტების მართვის კომპანიამ სოციალურ ქსელშიც გააზიარეს.
ფოტო აჭარის პროექტების მართვის კომპანიის ფეისბუქის გვერდიდან
საარჩევნო კოდექსი საჯარო მოხელეს აგიტაციაში ჩართვას უკრძალავს სამუშაო საათებში სამსახურებრივი მოვალეობის განხორციელებისას. ამ საჩივრებზე თანდართულია დათარიღებული მტკიცებულებები ფოტომასალის სახით.
საჩივრის განხილვა ჯერ არ დასრულებულა.
ქედიდან ცესკოში სამი საჩივარი შეუტანიათ. სამივე საჩივარი ენმ-ის წევრმა, ზვიად თურმანიძემ შეიტანა. ერთ შემთხვევაში ის ორი საარჩევნო უბნის ღია მდგომარეობაში უყურადღებოდ დატოვებაზე, ერთ შემთხვევაში კი ჩაკეტვაზე წერს, იმ დროს, როცა უბანი ამომრჩევლისთვის ღია უნდა იყოს. განმცხადებელი ასევე წერს, რომ კომისიას მტკიცებულებად აუდიომასალა წარუდგინა.
ბათუმიდან ცესკოში ხუთი საჩივარი შეუტანიათ, ხუთიდან სამი საჩივარი გადასატანი ყუთების სიაში ამომრჩევლის რეგისტრაციას ეხება, ორი კი – ადმინისტრაციული რესურსის გამოყენებას.
ენმ-ის წარმომადგენელი ცესკოს წერს, რომ ბათუმის #63-ე საუბნო საარჩევნო კომისიაში მითითებული იყო ორი მოქალაქის შესახებ, რომლებმაც გადასატანი ყუთის სიაში მათი მონაცემების შეტანა ტელეფონით მოითხოვეს. გადამოწმების შემდეგ დადგინდა, რომ მითითებული ნომერი არც მათ და არც მათი ოჯახის წევრს არ ეკუთვნოდა.
კიდევ ერთი საჩივრის მიხედვით #62-ე უბანზე გადასატან ყუთში დასარეგისტრირებელი პირის მონაცემები კედელზე იყო განთავსებული, სარეგისტრაციო ჟურნალში კი მისი მონაცემები არ იძებნებოდა.
ენმ-ის კიდევ ერთი საჩივრის მიხედვით, #13-ე საარჩევნო უბანთან „ოცნების“ სააგიტაციო მასალაა გამოკრული ისეთ ადგილზე, რომლის გავლის გარეშეც ამომრჩეველი უბანზე ვერ მოხვდება.
საჩივრები ჯერ განხილვის პროცესშია.
