ასოციაცია „ფლორა და ფაუნა“ უცხადებს, რომ არ დარეგისტრირდება რუსული კანონის რეესტრში.
„ასოციაცია „ფლორა და ფაუნა“, არც ახლა და არც არასდროს არ დარეგისტრირდება რუსული კანონის რეესტრში. ეს ჩვენთვის იყო, არის და იქნება კატეგორიულად მიუღებელი.
შესაბამისად, ვაჩერებთ საქმიანობას ფინანსური კუთხით (რადგან დაგვაჯარიმებენ და დაგვაყადაღებენ), თუმცა თემატურად ისევ აქტიურები ვიქნებით“, – აცხადებს ორგანიზაცია და განცხადებას ფეისბუქის გვერდზე აქვეყნებს.
ასოციაცია „ფლორა და ფაუნა“ ახორციელებს სხვადასხვა პროექტს, მაგალითად, შავი ზღვის ეკოსისტემაზე „ჩრდილოვანი თევზჭერის“ და მტაცებელი მოლუსკ რაპანის უარყოფითი ზეგავლენის შემცირებაზე.
მსგავსი განცხადებები ვრცელდება არაერთი ორგანიზაციის მხრიდან, რომლებიც არ ემორჩილებიან რუსულ კანონს და არ აპირებენ „უცხო ქვეყნის ინტერესების გამტარებელ“ პირთა რეესტრში“, – ნათქვამია ასოციაციის განცხადებაში, რომელიც დღეს, 2 სექტემბერს გავრცელდა ფეისბუქში.
ენათმეცნიერ მარინე ბერიძის განმარტებით, „…ინტერესების გამტარებელს [რიგით ქართველში] მხოლოდ და მხოლოდ უარყოფითი დამოკიდებულება შეიძლება ჰქონდეს. [ეს ტერმინი] მტრული ორგანიზაციების მონიშვნის საშუალებაა რიგითი ქართველისთვის“.
___
რუსული კანონი საქართველოში 3 ივნისიდან მოქმედებს. ის გრანტის მიმღებ მედია და არასამთავრობო ორგანიზაციებს „უცხოური ძალის ინტერესების გამტარებლის“, ხოლო, მათ შორის, აშშ-ს, ევროკავშირსა და საერთაშორისო ფონდებს, რომლებიც გრანტებს გასცემენ საქართველოში, „უცხოური ძალის“ სტატუსს მიანიჭებს.
იმ შემთხვევაში, თუ ორგანიზაცია უარს იტყვის „უცხოური ძალის ინტერესების გამტარის“ იარლიყზე, მაშინ, მისი ნების საწინააღმდეგოდ, მაინც დაარეგისტრირებენ და 25 000 ლარითაც დააჯარიმებენ.
