შეზლონგების „ღობე“ კვარიათის სანაპიროზე [ფოტო]

იმის გამო რომ, სამართალდარღვევაზე რეაგირებას არავინ ახდენს, კვარიათში ზღვის სანაპიროზე ვერ ჩამოჯდებით, თუ იქ ჩამომწკრივებულ რომელიმე შეზლონგს არ დაიქირავებთ.

ეს პრობლემა წლებია არსებობს ბათუმის სანაპიროზეც – მოიჯარეებს ბათუმის ბულვარი აუქციონის გარეშე იჯარით გადასცემს ტერიტორიას პლაჟზე, მოიჯარეები კი, სანაპიროსთან ახლოს ისე აწყობენ შეზლონგებს, რომ დამსვენებელი ან შეზლონგებს შორის დარჩენილ ვიწრო სივრცეში უნდა მოთავსდეს და ბუნების სილამაზის ნაცვლად, პლასტმასებს უყუროს, ან სანაპიროსგან მოშორებით, პრომენადთან ახლოს დაჯდეს.

შეზლონგები კვარიათის სანაპიროზე – ფოტო „ბათუმელები“/ცაგო კახაბერიძე

როგორ უნდა განთავსდეს შეზლონგები სანაპიროზე – წესი საიჯარო ხელშეკრულებაშია განსაზღვრული.

როგორც ბათუმის ბულვარის პრესცენტრში დღეს, 18 აგვისტოს გვითხრეს, კვარიათის პლაჟზე რეაგირებას ბათუმის მერია ახდენს. ბათუმის ბულვარს კი, შეტყობინება შეზლონგების განთავსების წესის დარღვევაზე ამ სეზონზე ჯერ არ მიუღია.

2023 წელს, როცა „ბათუმელები“ შეზლონგების პლაჟზე განთავსების წესების დარღვევაზე წერდა, ბათუმის ბულვარის ადმინისტრაციის პრესცენტრში გვიპასუხეს, რომ ამ კუთხით პრეტენზიით რომელიმე მოქალაქეს მათთვის არ მიუმართავს, ხოლო მონიტორინგის ჯგუფს, რომელიც ამას აკვირდება, რეგულაციის დარღვევა არ დაუფიქსირებია

ბათუმის მერიის ცხელ ხაზზე არავინ გვიპასუხა. „ბათუმელების“ სატელეფონო ზარს არც ქალაქის მერიის პრესცენტრში უპასუხეს.

შეზლონგები კვარიათის სანაპიროზე – ფოტო „ბათუმელები“/ცაგო კახაბერიძე

კვარიათში ზღვის პირველი ზოლი მთლიანად შეზლონგებს აქვს დაკავებული. მათი დიდი ნაწილი შესაძლოა ცარიელი იყოს, თუმცა შეზლონგების გამქირავებელი გეტყვით, რომ იჯარის ფული აქვს გადახდილი და თუ შეზლონგის დაქირავებას არ აპირებთ, მოშორებით უნდა დაჯდეთ.

პლაჟის მოიჯარეებმა აქცია 2024 წლის გაზაფხულზეც გამართეს და მოითხოვეს აუქციონი არ გამართულიყო – წლებია ჩვენ ვსარგებლობთ პლაჟით და აუქციონის შემთხვევაში შესაძლოა ჩვენი ბიზნესი დაიშალოსო.

წელსაც ბათუმის პლაჟი აუქციონის გარეშე, პირდაპირი წესით გაასხვისეს.

შეზლონგები კვარიათის სანაპიროზე – ფოტო „ბათუმელები“/ცაგო კახაბერიძე

შეზლონგები კვარიათის სანაპიროზე – ფოტო „ბათუმელები“/ცაგო კახაბერიძე

შეზლონგები კვარიათის სანაპიროზე – ფოტო „ბათუმელები“/ცაგო კახაბერიძე