“ასლან აბაშიძის საქმის” განხილვა ბათუმის საქალაქო სასამართლოში დღეს დასრულდა. მოსამართლე დავით მამისეიშვილმა აჭარის ავტონომიური რესპუბლიკის მთავრობის ყოფილ თავმჯდომარეს 15 წლით პატიმრობა მიუსაჯა. მას და კიდევ ხუთ მაღალჩინოსანს სისხლის სამართლის კოდექსის 16 მუხლის დარღვევაში ჰქონდათ ბრალი წაყენებული. ასლან აბაშიძეს ბრალად ედებოდა ნოდარ იმნაძის მკვლელობაც. ამ ნაწილში მოსამართლემ პროკურატურის კვალიფიკაცია შეცვალა და ასლან აბაშიძეს აუცილებელი მოგერიების ფარგლების გადამეტებისთვის 2,5 წელი მიუსაჯა.
ადვოკატ პაატა ბოლქვაძის თქმით, ასლან აბაშიძეს ასევე დაეკისრა 100 ათასი ლარის გადახდა ნოდარ იმნაძის ოჯახის სასარგებლოდ, ხოლოდ 30 ათასი ლარის გადახდა იმ დროისთვის უკანონო პატიმრობაში მყოფი – თენგიზ ასანიძის სასარგებლოდ. სისხლის სამართლებრივი დავის პარალელურად, სამოქალაქო წესით სასამართლოსთვის დაზარალებულების ოჯახის წევრებს ჰქონდათ სარჩელი შეტანილი.
ამავე საქმეში ბრალი ჰქონდა წაყენებული ასლან აბაშიძის მთავრობის უშიშროების მინისტრს – იოსებ გოგიტიძეს. მას სასამართლომ 12 წლით პატიმრობა მიუსაჯა. ნაწილობრივ გამართლა მაშინდელი უშიშროების სამინისტროს ადმინისტრაციული სამმართველოს უფროსი – ამირან კურცხალიძე. მას მხოლოდ სამსახურებრივი გულგრილობისთვის დაეკისრა 6 თვით პატიმრობა. მოსამართლე დავით მამისეიშვილმა 4 წლით და 6 თვით თავისუფლების აღკვეთა შეუფარდა დავით ხალვაშს, იგივე „ქელფეთას“. ის ასლან აბაშიძის პირადი დაცვის უფროსად მუშაობდა და ერთადერთია ამ საქმეში, ვინც სასჯელს უკვე იხდის.
ბათუმის საქალაქო სასამართლომ დამნაშავედ ცნო, მაგრამ სასჯელი არ შეუფარდა აბაშიძის მთავრობის კიდევ ორ მაღალჩინოსანს – ჯემალ გოგიტიძეს და ელგუჯა ჯინჭარაძეს. ისინი “ვარდების რევოლუციის” შემდეგ მოსკოვში გარდაიცვალნენ.
ადვოკატ პაატა ბოლქვაძის თქმით, განაჩენის გასაჩივრებას აპირებენ ასლან აბაშიძე, ამირან კურცხალიძე და დავით ხალვაში.
