„საერთაშორისო გამჭვირვალობა – საქართველო”, „DOCA – დოკუმენტური კინოს ასოციაცია“, „KineDok საქართველო“ და „ბათუმელები“ დღეს, 2 აგვისტოს, 18 საათზე, სასტუმრო „რედისონში“ გეპატიჟებათ ლანა ღოღობერიძის დოკუმენტური ფილმის – „დედა-შვილი ან ღამე არასდროს არ არის ბოლომდე ბნელი“ ჩვენებაზე.
დასწრება თავისუფალია.
ლანა ღოღობერიძის ეს ფილმი 2023 წელს ბერლინალეს ფორუმის სექციაზე აჩვენეს. ფილმის რეჟისორი და მთხრობელი, ლანა ღოღობერიძე იხსენებს დედას, ნუცა ღოღობერიძეს, პირველ რეჟისორ ქალს საქართველოში, რომელმაც მეუღლის დახვრეტამდე 3 ფილმის გადაღება მოასწრო, 1937 წელს კი ბოლშევიკურმა რეჟიმმა 10 წლით გადაასახლა.
ნუცას საკონცენტრაციო ბანაკებში გატარებული წლები და ზოგადად, დედასთან განშორების ტკივილი ლანა ღოღობერიძის, როგორც კინო, ისე სამწერლო შემოქმედების ორგანული ნაწილი გახდა.
დოკუმენტურ ფილმში ნახავთ, თუ როგორ იპოვა რეჟისორმა რეჟისორის დედის ნამუშევრები მოსკოვის საცავებში და როგორ აჩუქა მეორე სიცოცხლე ათეული წლების შემდეგ ხალხის მტრად შერაცხილი ხელოვანის კინომემკვიდრეობას.
ფილმის ჩვენების შემდეგ დისკუსია 1937-1938 წლებში აჭარაში დახვრეტილი ადამიანების ოჯახის წევრებთან ერთად გაგრძელდება. ტერორის, ტკივილის, ხალხის მტრად და აგენტებად გამოცხადების ამ ისტორიებს „ბათუმელები“ წლებია აქტიურად აშუქებს.
დისკუსიას „საერთაშორისო გამჭვირვალობა – საქართველოს“ ბათუმის ოფისის და სამოქალაქო საბჭოების კოორდინატორი, მალხაზ ჭკადუა გაუძღვება.
___________
ფოტოზე: კადრი ფილმიდან.
