ძლიერი წვიმის შედეგად ბათუმი-ქობულეთის ჩაქვის მონაკვეთი ისევ დაიტბორა. დატბორილია ჩაქვის ცენტრამდე მისასვლელი ადგილები.
როგორც მოქალაქეებმა „ბათუმელებს“ უთხრეს, წყლის დონემ ისე მოიმატა, რომ ავტომანქანების მოძრაობა შეჩერდა. გაჩერდა მუნიციპალური ავტობუსიც.
„ბენზინგასამართ სადგურთან ახლოს დადგა ისევ წყალი, ჩაქვის ცენტრთან მისვლა შეუძლებელია, სამსახურში ვეღარ წავედით… დაიტბორა საცხოვრებელი სახლების ეზოებიც,“ – უთხრა „ბათუმელებს“ თამარ დუმბაძემ.
ბათუმის მერიის პრესცენტრის ინფორმაციით, ავტომანქანების მოძრაობა ამ დროისთვის უკვე აღდგენილია. აქ დაზუსტებული ინფორმაციის მოწოდებას დაგვპირდნენ, რასაც აქვე გაგაცნობთ.
“თბილისის ქ. #45 ის მიმდებარედ განვითარებული მეწყრული პროცესების გამო სატრანსპორტო მოძრაობა შეფერხებული იყო ცენტრალური გზის მონაკვეთზე, სადაც უკვე განხორციელდა გზის გაწმენდის სამუშაოები და აღდგა სატრანსპორტო მოძრაობა,” – მოგვწერეს ბათუმის მერიიდან.
