რუსეთში საქართველოსთან დაკავშირებული დეზინფორმაციის გავრცელება კვლავ ყოველდღიურ რეჟიმში მიმდინარეობს.
ბოლო თვეებში რუსული პროპაგანდა საქართველოს მთავრობის მსგავსად ირწმუნება, რომ დასავლეთი გეგმავს ქართული ხელისუფლების რევოლუციური გზით შეცვლას და ამის განსამტკიცებლად საკუთარი დაზვერვის სამსახურს „იმოწმებს“, რომლის პრესსამსახურმაც რამდენიმე დღის წინ საკუთარი სცენარი წარადგინა:
„საქართველოს პრეზიდენტმა სალომე ზურაბიშვილმა უნდა ითამაშოს მთავარი როლი ანტისამთავრობო განწყობების გაღვივებაში. სახელმწიფოს მეთაური ინტერვიუს მისცემს ერთ-ერთ ამერიკულ მედიას, რომელშიც საქართველოს ხელისუფლებას დაადანაშაულებს თბილისის ევროკავშირში გაწევრიანებაზე მოლაპარაკების პროცესის „დეგრადაციაში“... ამომრჩეველი მომზადდება „ერთგვარი პოლიტიკური სიურპრიზისთვის“, რაც საბოლოოდ შეიძლება მორიგი „ფერადი რევოლუცია“ აღმოჩნდეს.
რუსული დაზვერვა ნებისმიერ პროტესტს, რაც სრულიად ბუნებრივია საქართველოში არსებული ვითარების პირობებში განვითარდეს, „ჰოლივუდურ გეგმად“ ასაღებს და წერს:
„საპროტესტო აქციების მონაწილეთაგან გათვალისწინებულია „საკრალური მსხვერპლი“, რომელიც „ხალხის რისხვას“ წარმართავს ძალოვნების წინააღმდეგ“.
რუსეთის დაზვერვის განცხადების გამოქვეყნებიდან მალევე რუსულმა პროპაგანდისტულმა მედიამ „საკრალური მსხვერპლის“ ვინაობა დააკონკრეტა და თქვა, რომ ის საქართველოს პრეზიდენტი, სალომე ზურაბიშვილი იქნება.
მაგალითად, კრემლისტური მედია Комсомольская Правда-ს კოლუმნისტი, პროპაგანდისტი ალექსანდრე გრიშინი წერს:
„სხვათა შორის, საკრალური მსხვერპლობა თავისუფლად შეიძლება გაქაჩოს თავად საქართველოს პრეზიდენტმა სალომე ზურაბიშვილმა. მით უმეტეს, რომ ეს ალბათ შეაშფოთებს საფრანგეთს, რომლის მოქალაქეობიდანაც იგი მოვიდა თბილისში“.
„პროვოკატორის როლს შეასრულებს საქართველოს პრეზიდენტი სალომე ზურაბიშვილი“, – აცხადებს რუსეთის პირველი არხის დიქტორი სიუჟეტში,
პროკრემლისტური პარტიის – „სოლიდარობა მშვიდობის სახელით“ გენერალური დირექტორი, მიხეილ ჟღენტი რუსეთის დაზვერვის მიერ გავრცელებული სცენარის თავიდან ასაცილებლად მიიჩნევს, რომ საქართველოს მეზობელი უნდა დაეხმაროს. მან ამის შესახებ ისაუბრა რუსეთის შსს-ს ყოფილი თანამშრომლის და ამჟამად პროპაგანდისტული არხის – „სოლოვიევ live“- ის თანაწამყვან, სერგეი კარნაუხოვის გადაცემაში.
„აქ ოქტომბერში ძალიან დაცხება… მინდა მივმართო ჩვენს მეზობლებს, ჩვენს მეგობრებს, ვის ინტერესებშიცაა, რომ არ დაუშვან აქ სისხლისღვრა, არ დაუშვან სამოქალაქო ომი, რომელიც ააფეთქებს მთელს რეგიონს“.
„გზა ცნობილია. მომართეთ რუსეთის ფედერაციის პრეზიდენტს ოფიციალურად სამხედრო-ტექნიკური დახმარებისთვის. ის [დახმარება] აღმოჩენილი იქნება, ყველაფერი კარგად იქნება“, – უპასუხა კარნაუხოვმა.
რუსულ მედიაში პარალელურად არ წყდება დისკუსია იმის შესახებ, თუ რა როლი შეიძლება ჰქონდეს რუსეთს ამ პროცესებში:
„საქართველოს პრეზიდენტი, ყოფილი ფრანგი დიპლომატი, მთლიანად ორიენტირებულია ნატოსა და შეერთებულ შტატებზე, იგი ყველანაირად თამაშობს ოპოზიციასთან. შეეცდება თუ არა ის, რომ ეს კარტი გაათამაშოს ნატოში და უნდა იფიქროს თუ არა რუსეთმა, როგორ არ დაუშვას ასეთი სცენარი?” – ჰკითხა სტუმრებს რუსული პროპაგანდისტული გადაცემის, Большая игра-ს წამყვანმა,დიმიტრი საიმსმა.
დიმიტრი საიმსი: „მინდა ვაშინგტონში გაიგონ, რომ ეს კითხვა, „რისი უფლება შეიძლება მისცეს რუსეთმა საკუთარ თავს?”, მოსკოვში სულ უფრო და უფრო აქტუალური ხდება“.
ამ გადაცემის სტუმარი, პუტინის იდეოლოგი ალექსანდრე დუგინი საქართველოში არსებულ სიტუაციას „კრიტიკულად“ სულაც არ ხედავს და მიიჩნევს, რომ „საქართველოში სიტუაციას აკონტროლებს ივანიშვილი და „ქართული ოცნება“.
„რეალურად ქართული პოლიტიკის უკან ერთი ადამიანი დგას – ივანიშვილი ბიძინა და მისი პოლიტიკა მიმართულია მხოლოდ საქართველოს სუვერენიტეტის გაძლიერებაზე და როგორც დასავლეთისგან, ისე ჩვენგან დამოუკიდებლობაზე.
ივანიშვილმა გადააქცია ეს სრულად რუსოფობიური და პროდასავლური ტერიტორია, ნორმალური მართლმადიდებელი მოსახლეობით, სრულიად სხვა რამედ.
მე ვფიქრობ, რომ ეს არის საკმაოდ კომპეტენტური პოლიტიკა ადამიანისა, რომელიც საქართველოში ფლობს სრულ ძალაუფლებას და რომელიც აწარმოებს ძალიან დელიკატურ თამაშს დასავლეთსა და ჩვენ შორის, მაგრამ ჯერჯერობით ის იგებს…
… არ უნდა შევუშალოთ ხელი საქართველოს შეიძინოს უფრო მეტი და მეტი სუვერენიტეტი და თავისუფლება იმიტომ, რომ ამ შემთხვევაში ეს თავისუფლება არის დასავლეთისგან, არა ჩვენგან…“ – ამბობს დუგინი.
გადაცემის კიდევ ერთი სტუმარი, რუსეთის ფედერაციის საბჭოს საერთაშორისო საქმეთა კომიტეტის თავმჯდომარის პირველი მოადგილე, ვლადიმერ ჯაბაროვიც ივანიშვილის იმედზეა:
„საქართველოს ლიდერი ბიძინა ივანიშვილია, ყოფილი რუსი ოლიგარქი, რომელიც გადავიდა იქ და გახდა მეთაური. მან შესანიშნავად იცის ჩვენი შესაძლებლობები… ჩვენმა ეკონომიკურმა სიძლიერემ, ჩვენთან თანამშრომლობამ ეკონომიკურ ჭრილში შეიძლება ითამაშოს დიდი პოზიტიური როლი საქართველოს ხელმძღვანელობისთვის, რომლებიც შესანიშნავად გაიგებენ რაშია მათი სარგებელი – ვაჭრობა რუსეთთან, ურთიერთობა ეკონომიკურ ჭრილში, ტურიზმის ჭრილში.
ხომ გახსოვთ ბოლო წლები, რამდენი ტურისტი იყო რუსეთიდან საქართველოში? იმიტომ რომ ჩვენ გვიყვარს საქართველო და ქართველი ხალხიც მთლიანობაში კარგადაა განწყობილი ჩვენ მიმართ. მოედნებზე კი გაულახავი სააკაშისტები დარბიან. ვფიქრობ, ქართული მთავრობა მათ მიხედავს“.
