„ბიბისის“ ცნობით, უეფამ გამოძიება დაიწყო თურქეთის ეროვნული ნაკრების მცველის, მერიჰ დემირალის საქციელზე, რომელმაც ავსტრიასთან მერვედფინალური მატჩის დროს ულტრანაციონალისტური ჟესტი გამოიყენა.
კერძოდ, ფეხბურთელმა მეორე გოლი აღნიშნა ე.წ. „მგლის მისალმებით“, ჟესტით, რომელიც დაკავშირებულია ულტრამემარჯვენე ექსტრემისტულ დაჯგუფებასთან – „რუხი მგლები“. ეს დაჯგუფება დაკავშირებულია თურქეთის მმართველ კოალიციურ „ნაციონალური მოძრაობის პარტიასთან“.
დემირალმა მატჩის შემდეგ თქვა, რომ მისალმება, რომელიც ავსტრიასა და საფრანგეთში აკრძალულია, წინასწარ ჰქონდა დაგეგმილი გოლის გატანის შემთხვევაში:
„ძალიან ვამაყობ, რომ თურქი ვარ, გოლის შემდეგ ეს ძლიერად ვიგრძენი, მინდოდა ეს გამეკეთებინა და მიხარია, რომ ეს გავაკეთე“.
დემირალმა ზეიმის ამსახველი ფოტო თავის X [ყოფილი ტვიტერი] ანგარიშზე გამოაქვეყნა წარწერით: „რა ბედნიერია ის, ვინც ამბობს – თურქი ვარ!”
„ბიბისი“ წერს, რომ დამნაშავედ ცნობის შემთხვევაში, დემირალი შეიძლება დაჯარიმდეს ან დისკვალიფიცირდეს ჩემპიონატიდან.
თურქეთის ნაკრების მცველმა, მერიჰ დემირალმა ავსტრიის ნაკრების წინააღმდეგ დაპირისპირებაში 2 ბურთი გაიტანა. თურქეთის ნაკრებმა გაიმარჯვა ანგარიშით 2-1 და მეოთხედფინალში გადავიდა, სადაც ნიდერლანდების ნაკრებს დაუპირისპირდება.
