რევაზ მიქელაძე სამსახურიდან მას შემდეგ გაათავისუფლეს, როცა აჭარის მთავრობის თავმჯდომარე, ზურაბ პატარაძე გახდა. ავტომატურად გათავისუფლებული სამთავრობო უწყებების ხელმძღვანელობის შემდეგ, რევაზ მიქელაძე მოადგილის პოზიციაზე აღარ აღადგინეს. ის აჭარის საავტომობილო გზებისა და სამელიორაციო სისტემების მართვის დეპარტამენტში მუშაობდა.
„პოლიტიკური მოტივაცია იყო რევაზ მიქელაძის გათავისუფლების საფუძველი. ის აჭარის გზების დეპარტამენტის უფროსის მოადგილედ მუშაობდა ბოლო 5 წლის განმავლობაში,“ – აცხადებს პეტრე ზამბახიძე „ერთიანი ნაციონალური მოძრაობიდან“.
„რამდენიმე დღის წინ, სოფელ ღორჯომში რევაზ მიქელაძე ლევან ვარშალომიძეს შემთხვევით შეხვდა. გათავისუფლების ბრძანებაში მითითებულია, რომ მთავრობის ახალი შემადგენლობის დაკომპლექტებაა მისი გათავისუფლების საფუძველი. ჩვენ გვაქვს გონივრული ეჭვი, რომ ეს იყო პოლიტიკური გადაწყვეტილება“, – ამბობს პეტრე ზამბახიძე, რომელმაც ბრიფინგზე ჟურნალისტებს რევაზ მიქელაძის ლევან ვარშალომიძესთან შეხვედრის ფოტოც აჩვენა.
თავად რევაზ მიქელაძე ამბობს, რომ ის ლევან ვარშალომიძის მთავრობის გუნდის წევრი იყო, მაგრამ ბოლო პერიოდში კავშირი „ნაციონალურ მოძრაობასთან“ აღარ ჰქონია: „მეჩეთიდან გამოვდიოდი და შემთხვევით შევხვდი. სამსახურიდან პოლიტიკური ნიშნით გამათავისუფლეს, ამაში ორი აზრი არ არსებობს… როცა მოვიკითხე, რის გამო არ აღმადგინეთ-მეთქი, დეპარტამენტის უფროსმა, გიორგი რომანაძემ მითხრა, რომ მთავრობის ახალმა თავმჯდომარემ თავი შეიკავა ჩემს დაბრუნებაზე.“
„გათავისუფლებას არანაირი კავშირი არ აქვს პოლიტიკასთან… ის წლების განმავლობაში მეგობრობს „ნაციონალური მოძრაობის“ წევრებთან და არავის შეუქმნია პრობლემა,“ – უთხრა „ბათუმელებს“ აჭარის საავტომობილო გზებისა და სამელიორაციო სისტემების მართვის დეპარტამენტის უფროსმა, გიორგი რომანაძემ.
