ბრიტანული „სქაი სპორტსის“ მიხედვით, ევროპის ჩემპიონატის პირველი ტურის შემდეგ, ფეხბურთელების საშუალო რეიტინგით საქართველო მე-3 ადგილზეა.
სიას სათავეში უდგას სლოვაკეთის ნაკრები, რომლის ფეხბურთელთა საშუალო რეიტინგია – 7,94. სლოვაკებმა პირველ ტურში ტურნირის ერთ-ერთ ფავორიტს, ბელგიის ნაკრებს სძლიეს ანგარიშით 0-1.
მეორე ადგილზეა რუმინეთის ნაკრები, რომლის ფეხბურთელთა საშუალო რეიტინგია – 6,94. რუმინეთის ნაკრებმა, ყველასთვის მოულოდნელად უკრაინის ნაკრები დაამარცხა 3-0.
რაც შეეხება საქართველოს, ნაკრების ფეხბურთელთა საშუალო რეიტინგია – 6,89 მიუხედავად იმისა, რომ პირველ ტურში წააგო თურქეთის ეროვნულ ნაკრებთან.
საქართველოს ნაკრების მეტოქეებიდან ჩეხეთის ნაკრები მე-7 ადგილზეა – 6,33 ქულით, თურქეთის ნაკრები მე-9 ადგილზე – 6,26 ქულით, ხოლო პორტუგალიის ნაკრები საშუალო 6,1 ქულით მე-14 ადგილზეა.
პირველი ტურის ყველაზე დაბალრეიტინგული გუნდი „სქაის“ მიხედვით შოტლანდიის ეროვნული ნაკრებია.
რაც შეეხება ფეხბურთელთა ინდივიდუალურ შეფასებას, აქ ყველაზე მაღალი ქულა, ინგლისის ეროვნული ნაკრების ფეხბურთელს ჯუდ ბელინგემს აქვს – 8,3. მეორე ადგილზე 8,2 ქულით ერთბაშად 4 ფეხბურთელია: გერმანიის ეროვნული ნაკრების ფეხბურთელი ჯამალ მუსიალა, სლოვაკეთის ნაკრებიდან მარტინ დუბრავკა, ასევე სლოვაკეთის ნაკრებიდან მილან შკრინიანი და სტანისლავ ლობოტკა.
„სქაი სპორტსის“ მიხედვით, ქართველი ფეხბურთელებიდან საუკეთესო შეფასება ჟორჟ მიქაუტაძეს აქვს – 7,7 ქულა, მას მოსდევენ გიორგი ჩაკვეტაძე და ანზორ მექვაბიშვილი 7,4 ქულით.
მთავარი ფოტო : nakrebi.ge
