რუსული კანონის მხარდამჭერ დეპუტატ ელისო ბოლქვაძეს პარიზის აეროპორტში მონა დაუძახეს.
„პარიზში რა გინდა, წადი მოსკოვში, აქ რა გინდა მონა“ – ასე მიმართეს მას მოქალაქეებმა პარიზის აეროპორტში.
ამ კადრების ამსახველი ვიდეო დღეს ფეისბუქზე გავრცელდა.
დღესვე ელისო ბოლქვაძემ ფეისბუქზე დაწერა, რომ „სამაგალითოდ გამოაჭენებს“ იმ ხალხს, ვინც მას მონა უწოდა.
„იმ უმსგავს ხალხს, ვინც თავს უფლებას აძლევს პარიზის აეროპორტში ისტერიკები გამართოს როგორც ნამდვილმა ქაჯებმა შემდეგს ვეტყოდი: უსახურები და საცოდავები ხართ. მონები და უსამშობლოები! გამოგაჭენებთ მალე სამაგალითოდ“ [სტილი დაცულია].
ბოლქვაძემ 9-ჯერ შეიტანა სტატუსში შესწორება. ერთ-ერთი შესწორებისას იგი წერს: „კიდე იყვნენ მასთან ერთად სხვებიც და მალე გავარკვევთ მათ ვინაობას“.
სქრინი ელისო ბოლქვაძის სტატუსის შესწორების ისტორიიდან
ბოლქვაძეს ფეისბუქზე, მისი სტატუსის ქვეშ უპასუხა მოქალაქემ, რომელმაც დეპუტატს რუსულ კანონზე მხარდაჭერისთვის აეროპორტში პასუხი მოსთხოვა:
„მე ვარ ელისო, არ იწვალოთ ბევრი ჩემს მოსაძებნად. კივილი და ისტერიკა თქვენ ატეხეთ, მე მხოლოდ ერთი კითხვა დაგისვით: რა გინდათ იმ ქვეყანაში, რომელსაც აგენტების დამფინანსებელს და მტერს ეძახით?! ქართველებისთვის ჩინეთი, რუსეთი და ირანი გინდათ და თქვენ პარიზებში დასეირნობთ! აი ეს არის სიმართლე და გცხვენოდეთ! მე არსად გავქცეულვარ, არაფერი მაქვს გასაქცევი და თქვენ როგორ გარბიხართ, კარგად ჩანს“.
ელისო ბოლქვაძე რუსული კანონის მხარდამჭერი მეორე დეპუტატია, რომელსაც გზად შემხვედრი მოქალაქეები პასუხს სთხოვენ რუსული კანონის მხარდაჭერისთვის.
ამავე თემაზე:
„ფორთოხალი პრობლემა არ არის, თქვენ მომავალი წაგვართვით“ – რა უთხრეს დეპუტატს მაღაზიაში
