აჭარის ფინანსთა და ეკონომიკის მინისტრის მოადგილე გადადგა – „არ უკავშირდება პოლიტიკას“

აჭარის ეკონომიკის მინისტრის მოადგილე თანამდებობიდან გადადგა. ინფორმაცია ამის შესახებ დღეს, 30 მაისს გახდა ცნობილი.

აჭარის ფინანსთა და ეკონომიკის სამინისტროს პრესსამსახურის ინფორმაციით, „სულხან ღლონტმა თანამდებობა პირადი განცხადების საფუძველზე დატოვა 2024 წლის 24 მაისს“.

თანამდებობის დატოვების შესახებ ინფორმაციას ადასტურებს თავად სულხან ღლონტი.

„ბათუმელების“ კითხვაზე, მისი წასვლა ხომ არ უკავშირდებოდა რუსულ კანონს, აჭარის ფინანსთა და ეკონომიკის მინისტრის უკვე ყოფილმა მოადგილემ გვითხრა, რომ არა.

„[ჩემი გადადგომა] არ უკავშირდება პოლიტიკას. რამდენიმე თვის წინაც ვითხოვე თანამდებობიდან წასვლა. ყველას წარმატებას ვუსურვებ, პირველ რიგში ჩვენს ქვეყანას,“ – ამბობს სულხან ღლონტი.

დღესვე გავრცელდა ინფორმაცია, რომ თანამდებობა დატოვა მინისტრის კიდევ ერთმა მოადგილემ, გიორგი სურმანიძემ. თავად სურმანიძე ტელეფონს არ პასუხობს, სამინისტროს პრესსამსახურის ცნობით კი, მინისტრის მოადგილეს, გიორგი სურმანიძეს თანამდებობა არ დაუტოვებია.