ბათუმში ხვალ, 16 მაისს, დედების აქცია გაიმართება რუსული კანონის წინააღმდეგ.
აქცია, რომლის სლოგანია – „არა რუსულ კანონს“, 17 საათზე, ბათუმის ცენტრალური პარკის კოლონადებთან დაიწყება.
ბოლო ორი დღეა ბათუმში, სტუდენტების გარდა, სკოლის მოსწავლეებიც მართავენ აქციას რუსული კანონის წინააღმდეგ. მოსწავლეების აქცია დღესაც, 15 მაისს გაიმართა. რუსული კანონის წინააღმდეგ მოსწავლეებმა მსვლელობა გამართეს ქალაქის ქუჩებში.
უკვე თვეზე მეტია ბათუმში სისტემატურად იმართება აქციები რუსული კანონის წინააღმდეგ. თითქმის ყოველ საღამოს ბათუმის ქუჩებში ასობით და რიგ დღეებში – ათასობით ახალგაზრდა მოითხოვს რუსული კანონის გაწვევას.
- რა ხდება
საქართველოში მიმდინარე მრავალათასიანი საპროტესტო აქციების მიუხედავად, საქართველოს პარლამენტმა 14 მაისს რუსული კანონი მესამე მოსმენით დაამტკიცა.
კენჭისყრაში მონაწილეობა 116-მა დეპუტატმა მიიღო. მათგან, რუსული კანონის მიღებას მხარი 84-მა დეპუტატმა დაუჭირა.
რუსული კანონი ახლა პრეზიდენტს ხელმოსაწერად უნდა გაეგზავნოს. აღნიშნულ საკითხზე სალომე ზურაბიშვილს პოზიცია ცნობილია. პრეზიდენტი გეგმავს, რომ კანონს ვეტო დაადოს, თუმცა „ქართულ ოცნებას“ პარლამენტში საკმარისი მანდატები აქვს იმისათვის, რომ პრეზიდენტის ვეტო დაძლიოს.
პრეზიდენტს ვეტოს გამოსაყენებლად ორკვირიანი ვადა აქვს.
შეგახსენებთ, რომ რუსული კანონი 2023 წლის მარტში მასობრივი პროტესტის შემდეგ “ოცნებამ” უკან გაიწვია და პირობა დადო, რომ მას აღარასოდეს დაუბრუნდებოდა. ანალოგიურმა კანონმა რუსეთში გააქრო ყველა დემოკრატიული ინსტიტუტი და გაამყარა პუტინის რეჟიმი.
