დღეს, 23 აპრილს, გამთენიისას, სულ ცოტა ხუთი მიგრანტი, მათ შორის ბავშვი, ქალი და სამი მამაკაცი, ინგლისის არხის გადაკვეთისას დაიღუპა. საფრანგეთის ოფიციალური უწყებების განცხადებით, პატარა ნავი, რომელზეც დაახლოებით 110 ადამიანი იმყოფებოდა, საფრანგეთიდან დიდი ბრიტანეთის მიმართულებით მიცურავდა.
დასავლური მედიის ინფორმაციით, გემი თავდაპირველად ქვიშის ნაპირს შეეჯახა, რამაც გადატვირთულ გემზე ხალხის მოძრაობა და მათი წყალში გადავარდნა გამოიწვია.
როგორც საფრანგეთის სანაპირო დაცვამ განაცხადა, დაშავებულთაგან 4 ადამიანი უკვე გადაიყვანეს საავადმყოფოში, მათ სიცოცხლეს საფრთხე არ ემუქრება. 47 ადამიანი ადგილობრივმა სამაშველო სამსახურმა გადაარჩინა, 50 მიგრანტმა კი გზის გაგრძელება გადაწყვიტა.
მედია აღნიშნულ ფაქტს რამდენიმე საათით ადრე ინგლისის პრემიერ მინისტრის, რიში სუნაკის მიერ მიღებულ კანონს უკავშირებს, რომლის მიხედვითაც თავშესაფრის მაძიებლებს დეპორტაციით რუანდაში დააბრუნებენ.
დაღუპულთა შესახებ ინფორმაციის გავრცელების შემდეგ, ინგლისის შინაგან საქმეთა მინისტრმა ტვიტერის ოფიციალურ გვერდზე განცხადება გამოაქვეყნა:
„ეს ტრაგედიები უნდა შეწყდეს. სახელმწიფო ყველაფერს აკეთებს იმისთვის, რომ შეწყვიტოს ვაჭრობა, შეაჩეროს [მიგრანტთა] ნავები და საბოლოოდ, გაარღვიოს ბოროტი ადამიანების კონტრაბანდული ბიზნეს მოდელი, რათა ადამიანების სიცოცხლე საფრთხეში აღარ ჩააგდონ“- განაცხადა ჯეიმს კლევერლმა.
„გარდიანის“ ინფორმაციით, წელს უკვე 6000-ზე მეტმა მიგრანტმა და ლტოლვილმა გადაკვეთა საზღვარი, რაც წინა წლის ანალოგიურ პერიოდთან შედარებით, მაჩვენებელი მეოთხედით არის გაზრდილი. გარდაცვლილია 15 ადამიანი, მათ შორის ბავშვები.
___________
ავტორი: ანა ბაჟუნაიშვილი
