„არა რუსულ კანონს“ საპროტესტო აქცია გაიმართა დუბლინში, საქართველოს საელჩოსთან, ქართველი ემიგრანტების ორგანიზებით.
როგორც დუბლინში მცხოვრები ქართველი ემიგრანტების მიერ გავრცელებულ რელიზშია ნათქვამი, „ქართველმა ემიგრანტებმა სრული მხარდაჭერა გამოუცხადეს საქართველოს ევროპულ მომავალს და დაგმეს რუსული კანონის პირველი მოსმენით მიღება, საქართველოს პარლამენტის მიერ“.
საპროტესტო აქცია დუბლინში
„მე დავიბადე დამოუკიდებელ საქართველოში და არ დავუშვებთ რომ ჩვენი შვილები ისევ საბჭოთა კავშირში გაჩნდნენ. ჩვენი ვალია დავიცვათ ქვეყნის სუვერენიტეტი და ხელი შევუწყოთ მის განვითარებას, რასაც ეს კანონი უდიდეს საფრთხეს უქმნის. 9 აპრილის გმირების სისხლით მოპოვებულ სამშობლოს არ დავუთმობთ რუსეთსა და მის საცეცებს საქართველოში,“- აქციაზე სიტყვით გამოვიდა ერთ-ერთი თანაორგანიზატორი კახი გიგაური.
ეს დუბლინში გამართული რიგით მეორე აქციაა. აქციის ორგანიზატორების თქმით, იმ შემთხვევაში თუ ხელისუფლება არ ჩააგდებს აღნიშნულ კანონპროექტს, ემიგრანტების აქციები კვლავ გაგრძელდება.
„აქციების მიზანია ხელისუფლებამ გაიგონოს ქართველი ხალხის და მათ შორის ემიგრანტების ხმა, რომელმაც უპრეცედენტო ერთობით, მკაფიოდ თქვა რომ წინააღმდეგია ე.წ. გამჭვირვალობის შესახებ კანონის და რომ ამ კანონს გამჭირვალობასთან არაფერი აკავშირებს“, – ნათქვამია დუბლინში მყოფი ქართველი ემიგრანტების მიერ გავრცელებულ რელიზში.
საპროტესტო აქცია დუბლინში
