აჭარის უმაღლესი საარჩევნო კომისიის მდივანი 8 ხმით სოფიო კახაძე გახდა. იგი უსკო-ს წევრად, უმაღლესმა საბჭომ, 2016 წლის 5 ივლისს აირჩია. უმაღლესი საარჩევნო კომისიის მდივნის თანამდებობაზე კიდევ ერთი კანდიდატი იყო წარდგენილი. რამაზ გოლომანიძემ 5 ხმა მიიღო. მდივნის ასარჩევად მინიმუმ 7 წევრის მხარდაჭერა იყო საჭირო.
„საარჩევნო კომისია სრულფასოვან მუშაობას მაშინ შეძლებს, როცა არჩეული იქნება მდივანიც და თავმჯდომარის მოადგილეც. ამ შემთხვევაში შეფერხებები იმიტომ არ იყო, რომ კომისიაში მდივნის მოვალეობის შემსრულებელი გვყავდა… მადლობა ყველას, ვინც მხარი დამიჭირა“- ამბობს სოფიო კახაძე.
უსკოს თავმჯდომარის მოადგილე გუგული დუაძეა.
დღეს, 18 ივლისის, სხდომაზე ცვლილება შევიდა ასევე უსკოს რეგლამენტშიც. ამიერიდან უსკო ვალდებულია სხდომის გამართვის წინა დღეს გამოაქვეყნოს ინფორმაცია კომისიის ვებ-გვერდზე, დასაშვებია გამონაკლისი, რაც ინფორმაციის გავრცელებას 3 საათით ადრე ითვალისწინებს.
ცვლილების თანახმად, თუ უსკოს სხდომას არ ესწრება კომისიის სრული შემადგენლობის უმრავლესობა [მინიმუმ 7 წევრი, 13-დან], სხდომა უნდა გადაიდოს, ოღონდ, სხდომის ჩატარების თარიღი თავმჯდომარემ უნდა გამოაცხადოს.
