Batumelebi | პოლიციელებისთვის წინააღმდეგობის გაწევის საქმეზე ექსპერტი დაიკითხა პოლიციელებისთვის წინააღმდეგობის გაწევის საქმეზე ექსპერტი დაიკითხა – Batumelebi
ნეტგაზეთი • RU

პოლიციელებისთვის წინააღმდეგობის გაწევის საქმეზე ექსპერტი დაიკითხა

სასტუმრო „ლეო გრანდთან” დაკავებული ირაკლი ჯაშის და ირაკლი ბჟალავას საქმეზე დღეს შსს-ს აჭარის რეგიონული ექსპერტიზის ბიუროს ექსპერტმა, ლევან ფუტკარაძემ სასამართლოს ჩვენება მისცა. ექსპერტიზის დასკვნის მიხედვით, სამივე პოლიციელს აღენიშნებოდა სისხლჩაქცევები და სხეულის მსუბუქი დაზიანებები.

ირაკლი ჯაში და ირაკლი ბჟალავა მიმდინარე წლის 16 აპრილს დააკავეს სასტუმრო „ლეო გრანდის“ მიმდებარე ტერიტორიაზე. რამდენიმე დღეში ადვოკატებმა სასტუმროს სათვალთვალო კამერის ჩანაწერი მოიპოვეს, სადაც ჩანს, რომ ბრალდებულები მხოლოდ სიტყვიერად უპირისპირდებიან პოლიციელებს. მანამდე გამოძიებისთვის მიცემულ ჩვენებებში პოლიციელებმა თქვეს, რომ ჯაში და ბჟალავა მათ ფიზიკურადაც დაუპირისპირდნენ.

ექსპერტს ადვოკატმა დავით ჯაფარიძემ ბრალდებულების დაზიანებებზეც დაუსვა შეკითხვა, თუმცა პროკურორმა, ზურაბ კონცელიძემ მისი აცილება მოითხოვა და მოსამართლის თანხმობა მიიღო. მოსამართლე ირაკლი შავაძემ განმარტა, რომ ექსპერტის დაკითხვა ორივე მხარის მოთხოვნაა, დღისთვის კი იგი პროკურატიურის მოთხოვნით აძლევდა სასამართლოს ჩვენებას. ბრალდებულების შესახებ კითხვების დასმის საშუალება ადვოკატებს იგივე ექსპერტთან მორიგ სხდომაზე შეეძლებათ.

“ამავე ექსპერტმა დადო დასკვნა ბრალდებულების სხეულის დაზიანებებზე. ირაკლი ჯაშს 18 დაზიანება აქვს, მათ შორის ზურგის არეში. პოლიციელებმა თქვეს, რომ ბრალდებულების დაკავების დროს მიიღებდნენ ისინი სისხლჩაქცევებს, რადგანაც პოლიციელებს წინააღმდეგობა გაუწის, მაგრამ საინტერესოა, დაკავების დროს, საიდან უნდა მოხვედროდა ადამიანს დაზიანება ზურგის არეში”, – ამბობს ადვოკატი დავით ჯაფარიძე “ბათუმელებთან”.

დღეს, 18 ივლისს გამართულ სხდომაზე პროკურატურამ მოწმის სახით მხოლოდ ერთი ექსპერტი დაკითხა. ადვოკატების დავით ჯაფარიძის და რამინ პაპიძის თქმით, პროკურატურა არ უნდა აჭიანურებდეს პროცესს და შესაძლებელი იყო რამდენიმე მოწმის დაკითხვა ერთ სხდომაზე.

ბრალდებული ირაკლი ჯაში სასამართლომ 5 ათას ლარიანი გირაოს სანაცვლოდ გათავისუფლებულია, ირაკლი ბჟალავა კი დღემდე წინასწარ პატიმრობაში იმყოფება. ის პირობითი მსჯავრის ქვეშ იმყოფებოდა, როცა პროკურატურამ ახალი ბრალი წაუყენა – პოლიციელებისთვის წინააღმდეგობის გაწევა. ბრალის დადასტურების შემთხვევევაში, ირაკლი ჯაშს და ირაკლი ბჟალავას 4-დან 7-წლამდე თავისუფლების აღკვეთა ელოდებათ.

ნეტგაზეთის მასალების სხვა გამოცემებში გადაბეჭდვის წესი
ავტორი