სიახლეები

სარფის პლაჟზე ახალი კიბეებისა და პანდუსის მოსაწყობად 137 ათასი ლარია გამოყოფილი

11.03.2024 • 3160
სარფის პლაჟზე ახალი კიბეებისა და პანდუსის მოსაწყობად 137 ათასი ლარია გამოყოფილი

ხელვაჩაურის მერია სარფის სანაპირო ზოლში პლაჟზე ჩასასვლელი კიბეების, პანდუსისა და ხის ბილიკების მოწყობას გეგმავს. სამუშაოებისთვის ადგილობრივი ბიუჯეტიდან 137 ათას 294 ლარია გამოყოფილი.

ხელვაჩაურის მუნიციპალური ინსპექციის, ინფრასტრუქტურისა და კეთილმოწყობის სამმართველომ ტენდერი „სარფის სანაპირო ზოლში პლაჟზე ჩასასვლელი კიბეების, ბილიკის, პანდუსის, საშხაპეებისა და გასახდელების მოწყობაზე“ გამოაცხადა, თუმცა, როგორც სამმართველოში გვითხრეს, ამ ტენდერით მხოლოდ კიბეების, ბილიკისა და პანდუსის მოეწყობა იგეგმება.

„სამუშაოები დავყავით ორ ეტაპად. პირველ ეტაპზე მოეწყობა ორი კიბე, რომლებსაც, პროექტით, თან მიყვება პანდუსებიც. ასევე მოეწყობა ხის ბილიკები ზღვასთან მისასვლელად, რომლებიც გათვლილი იქნება ეტლით მოსარგებლეებისთვისაც. რაც შეეხება საშხაპეებს და გასახდელებს, მეორე ეტაპზე მოეწყობა, რაზედაც ტენდერს ცალკე გამოვაცხადებთ“, – გვითხრეს სამმართველოში.

ტენდერში წინადადებების მიღება 2024 წლის 22 მარტს დაიწყება და 27 მარტს დასრულდება.

ტენდერის პირობის მიხედვით, სამუშაოები უნდა დაიწყოს გამარჯვებულთან ხელშეკრულების გაფორმებიდან არაუმეტეს 10 დღის ვადაში და დასრულდეს ხელშეკრულების გაფორმებიდან 100 დღეში – ექსპერტიზის დასკვნის წარმოდგენის ვადის ჩათვლით [აქედან გამომდინარე, თუ ტენდერი შედგა, სამუშაოები სანაპიროზე შესაძლოა, სულ ცოტა, ივნისის ბოლომდე გაგრძელდეს].

მიმწოდებელი ვალდებული იქნება სამუშაოები შეასრულოს იმ საპროექტო-სახარჯთაღრიცხვო დოკუმენტაციის შესაბამისად, რომელიც თან ახლავს ტენდერს.

პროექტის მიხედვით, დაგეგმილია „არსებული ლითონის მოაჯირის დემონტაჟი; რკინა-ბეტონის კიბის, პანდუსისა და ბილიკის მოწყობა; სანაპირო ზოლში არსებული კედლის გასუფთავება და დეკორატიულად მოხატვა [ფერი და დიზაინი შეთანხმდება დამკვეთთან].“

„შესრულებული სამუშაოს ხარისხის საგარანტიო ვადა შეადგენს, საბოლოო მიღება-ჩაბარების აქტის გაფორმებიდან 1 წელს. აღნიშნულ პერიოდში რაიმე წუნის [ნაკლოვანებები, დეფექტი] აღმოჩენის შემთხვევაში კი, მიმწოდებელი ვალდებულია შეტყობინების მიღებიდან, შემსყიდველის მიერ განსაზღვრულ გონივრულ ვადაში, გამოასწოროს წარმოქმნილი ნაკლოვანება/დეფექტი საკუთარი ხარჯებით“, – აღნიშნულია ტენდერის პირობაში.

სარფის პლაჟთან შესაძლოა ჭოროხი-სარფის ავტობანიც გავიდეს, რასაც ადგილობრივი მოსახლეობა ეწინააღმდეგება.

ბათუმი-სარფის ავტობანის პროექტის ის ვარიანტი, რომლის მიხედვითაც გზების დეპარტამენტი ახალი ავტომაგისტრალის აშენებას გეგმავს, სარფში გამართულ შეხვედრაზე დაიწუნეს. ამ შეხვედრაზე დეპარტამენტის მიერ მომზადებული სკოპინგის ანგარიში განიხილეს, რომელიც ბათუმი-სარფის ავტობანის პროექტს ეხება.

სკოპინგის დასკვნის დოკუმენტის მიხედვით, მოსახლეობა ფიქრობს, რომ ამ კონკრეტული პროექტის განხორციელებით დაიკარგება სარფის პლაჟი, რაც „უარყოფითად იმოქმედებს სარფის ტურისტული პოტენციალის განვითარებასა და ზოგადად მის პერსპექტივაზე“.

ვრცლად ამ თემაზე: ემუქრება თუ არა საფრთხე სარფის პლაჟს – ავტობანის პროექტი

სარფი: არსებული სიტუაცია და ამ ტერიტორიის „მოწესრიგების“ სავარაუდო სქემა [მარჯვნივ] ახალი გზის გაყვანის შემდეგ / ფოტო სკოპინგის ანგარიშიდან

 

მთავარი ფოტო არქივიდან: სარფი / ფოტო: გურამ მურვანიძე/„ბათუმელები“

 

გადაბეჭდვის წესი


ასევე: